Илон хато қилди – Маскнинг отаси

Машҳур миллиардер Илон Маскнинг отаси Эррол Маск ўғли чарчагани сабабли АҚШ Президенти Дональд Трампга қарши хато фикрлар айтганини билдирди. Бу ҳақда у кеча, 8 июнь куни Россиянинг Царьград институти иштирокида Москвада ташкил этилган “Келажак форуми 2050” анжуманида қатнашиши олдидан маълум қилди.

“Трамп ғалаба қозонади – у Президент. У Президент этиб сайланган. Илон эса хато қилди, деб ўйлайман. У чарчаган, стрессда. Беш ой давомида тинимсиз стресс остида яшади”, деган Илон Маскнинг отаси. 

Эррол Маскнинг сўзларига кўра, Илон ҳозир Оқ уй билан боғлиқ травматик ҳолат сабабли стресс ҳолатига тушган. Шунга қарамай, у можаро яқин орада тугашига ишонишини айтган.

Маск ва Трамп ўртасидаги можаро

Жорий йилнинг июнь ойида Илон Маск билан АҚШ Президенти ўртасида ижтимоий тармоқларда жиддий тортишув юз берди. Маск Трампнинг солиқ имтиёзларига оид қонун лойиҳаси ва тариф сиёсатини танқид қилди. Президент эса бюджетдан “миллиардлаб доллар” тежашнинг энг осон йўли – бу Маск компаниялари билан давлат субсидиялари ва шартномаларни тўхтатиш, деб жавоб берди.Трампнинг айтишича, Маскнинг норозилиги аслида электромобиллар учун берилаётган давлат субсидияларининг камайиши билан боғлиқ.

Бу ҳолат дунёнинг энг бой одамларидан бири бўлган Маскнинг ғазабига сабаб бўлди. У бир неча соат ичида Х ижтимоий тармоғида қонун лойиҳасига қарши бир нечта постлар эълон қилди ва Трампнинг субсидиялар ҳақидаги сўзларини “очиқ ёлғон” деб атади.

“Агар мен бўлмаганимда, Трамп сайловда ютқазган бўларди. Демократлар Вакиллар палатасини назорат қиларди, республикачилар эса Сенатда 51га 49 ҳисобида устунликка эга бўларди. Бу қандай ношукрлик”, дея ёзганди Маск. 

Трамп эса ўзининг Truth Social платформасида яна субсидиялар масаласини кўтарди ва “Илон ақлдан озди”, дея ёзди. 

Шунга жавобан, Маск энди қонун лойиҳасини эмас, балки Трампнинг ўзини танқид қилишга ўтди. У Трамп Жеффри Эпштейн иши билан боғлиқ ҳужжатларда тилга олинганини ёзди. Маск Х ижтимоий тармоғида Трампнинг 1992 йилда Эпштейннинг қизлар билан ўтказган зиёфатларидан биридаги видеосини репост қилди.

Маск, шунингдек, АҚШда янги сиёсий партия тузиш таклифини илгари сурди ва Х ижтимоий тармоғида сўровнома ўтказди. 2,5 миллиондан ортиқ фойдаланувчининг 80 фоиздан зиёди бу фикрни қўллаб-қувватлади.