Mask Trampga qarshi bosh ko‘tardi. U yangi partiya ochmoqchi

north_east

Trampning jinoyatchi Epshteynga aloqasi borligi aytildi

Tesla hamda SpaceX kompaniyalari egasi, Hukumat samaradorligi departamenti (DOGE) sobiq rahbari, amerikalik milliarder Ilon Mask AQSHda yangi siyosiy partiya tuzishni va uni “Amyerica Party” (Amerika partiyasi) deb atashni taklif qildi. Bu haqda u o‘zining X’dagi sahifasida yozdi.

Mask o‘z sahifasida yangi partiya tuzish haqida so‘rovnoma o‘tkazgan. U o‘tkazgan so‘rovnomada 5,6 milliondan ortiq kishi qatnashgan. “Amerikada yangi siyosiy partiya tuzish vaqti kelmadimi?” deb yozilgan so‘rovnoma izohida. Ishtirokchilarning 80 foizi bu fikrni qo‘llab-quvvatlagan, qolgan 20 foizi esa qarshi chiqqan.

Mask shuningdek, sahifasida amerikalik bloger va kripto-tadbirkor Mario Naufalning postini bo‘lishgan. Naufal 80 foiz ovoz berganlarni “mavjud siyosiy elitadan charchaganlar” deb atagan.

Naufalning so‘zlariga ko‘ra, Amerika jamoatchilik fikri institutining aniqlashicha, amerikaliklarning 43 foizi ikkala asosiy partiyani ham rad etadi, shulardan 56 foizi Maskga nisbatan ijobiy munosabatda. Maskga shuningdek, demokratlarning 34 foizi va respublikachilarning 72 foizi ijobiy qaraydi.

Naufalga ko‘ra, “Amerika partiyasi” saylovchilarga “yangi rahbariyat emas, balki butun botqoqlikni yo‘q qilish” imkonini beradi.

Mask va Tramp do‘stligining tarixi

Ilon Mask birinchi marta 2025 yilning 5 oktyabrida Pensilvaniya shtatining Batler shahrida o‘tkazilgan Trampning saylovoldi mitingida ishtirok etgan. Tadbir davomida u respublikachini “Amerikadagi demokratiyani saqlab qola oladigan yagona nomzod” deb atagan. U shuningdek, “agar Tramp g‘alaba qozonmasa, bu so‘nggi saylovlar bo‘ladi”, deya bayonot bergan. Unda Trampning mashhur shiori – “Make America Great Again” yozilgan beysbol qalpog‘i bo‘lgan.

Mask 2025 yilda AQSHdagi eng yirik siyosiy donor bo‘ldi. U Tramp va uning partiyasidagi ittifoqchilarining saylov kampaniyasiga 274 million dollar xayriya qildi.

Joriy yilning iyun oyida esa Tesla va SpaceX rahbari bilan AQSH Prezidenti o‘rtasida ijtimoiy tarmoqlarda tortishuv yuz berdi. Mask Trampning soliq imtiyozlariga oid qonun loyihasi va tarif siyosatini tanqid qildi. Prezident esa byudjetdan “milliardlab dollar” tejashning eng oson yo‘li – bu Mask kompaniyalari bilan davlat subsidiyalari va shartnomalarni to‘xtatish, deb javob berdi.

2024 yilgi kampaniyada rekord darajada – 288 million dollar sarflagan Maskning fikricha, u bo‘lmaganda Tramp saylovda yutqazgan bo‘lardi. Bundan tashqari, milliarder Respublikachilar kampaniyasiga 100 million dollar o‘tkazish niyatidan qaytganini va endilikda demokratlarni qo‘llab-quvvatlash imkoniyatini ko‘rib chiqayotganini bildirgan. Tramp bunga javoban Maskni “aqldan ozgan” deb atadi.

Eslatib o‘tamiz, avvalroq Ilon Mask bilan janjal fonida AQSH Prezidenti Donald Tramp ilgari sotib olgan Tesla avtomobilini sotish yoki sovg‘a qilishni o‘ylayotgani haqida xabar berilgandi. U bu mashinani Tesla  bosh direktori Ilon Maskni qo‘llab-quvvatlash maqsadida xarid qilgan edi, ammo ordagi tortishuv – do‘stlik chegarasini buzib tashladi.