“Ikki 15 bir 30”: SES raisi o‘rinbosarlari qayta o‘z o‘rniga tayinlandi

Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi raisiga o‘rinbosarlar tayinlandi. Bu haqda Sog‘liqni saqlash vazirligi xabar berdi. 

Manbaga ko‘ra, Nurmat Otabekov Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi raisi birinchi o‘rinbosari etib tayinlandi.

Otabekov 2020 yildan shu vaqtga qadar Sanitariya-epidemiologik osoyishtalik va jamoat salomatligi xizmati boshlig‘ining o‘rinbosari lavozimida ishlab kelayotgan edi.

Xuddi shu yildan boshlab Sanitariya-epidemiologik osoyishtalik va jamoat salomatligi xizmati boshlig‘ining ilm-fan va innovatsiya bo‘yicha o‘rinbosari sifatida faoliyat ko‘rsatayotgan Botirjon Qurbanov esa SES qo‘mitasining rais o‘rinbosari lavozimiga o‘tdi. 

Shuningdek, Qobiljon Hayitov Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi raisi o‘rinbosari lavozimiga tasdiqlangan. U avvallari Davlat soliq qo‘mitasi Moliya va moddiy-texnika ta’minoti boshqarmasi Buxgalteriya bo‘limi davlat soliq bosh inspektori bo‘lib ishlagan.

Ma’lumot uchun, joriy yilning yanvar oyida O‘zbekiston Respublikasi Prezidentining tegishli qarori bilan  bugungacha Sanitariya-epidemiologik osoyishtalik va jamoat salomatligi xizmati  Sog‘liqni saqlash vazirligi huzurida qo‘mitaga aylantirilgan edi.

Eslatib o‘tamiz, o‘zgarishlardan so‘ng “SES” rahbari o‘tirgan o‘rnini yo‘qotmagandi.