Голливуд юлдузи ўз уйида ўлик ҳолда топилди

Кеча, 14 декабрь куни америкалик актёр ва режиссёр Роб Райнер ҳамда унинг рафиқаси Мишел Лос-Анжелесдаги уйида ўлик ҳолда топилди. Полиция уларнинг ўлимини эҳтимолий қотиллик сифатида тергов қилмоқда. Бу ҳақда BBC хабар берди.

Полиция Лос-Анжелеснинг кўплаб машҳурлар яшайдиган Брентвуд ҳудудида топилган 78 ёшли эркак ва 68 ёшли аёлнинг исмларини расман ошкор қилмаган. Бироқ оила вакиллари гап айнан Роб Райнер ва унинг рафиқаси Мишел ҳақида кетаётганини тасдиқлаган.

“Бу кутилмаган йўқотиш бизни чуқур қайғуга солди”, дейилади баёнотда.

Ҳодиса тафсилотлари ҳозирча очиқланмаган. Маълум бўлишича, иш билан қотилликларни тергов қилиш бўлими шуғулланмоқда, ҳозирча гумондорлар йўқ. Полиция Райнерлар оиласи аъзолари билан суҳбатлашишни ва эр-хотиннинг уйини синчковлик билан тинтув қилишни режалаштирмоқда.

Маълумот учун, Райнер 1980 йилларда режиссёрлик фаолиятини бошлаган. Унинг катта экрандаги илк иши утопик британ рок гуруҳи ҳақида суратга олинган “Бу – Spinal Tap” (This is Spinal Tap!) номли ҳужжатли фильм бўлган. Бу фильм кейинчалик машҳур бўлиб, кўплаб “энг яхши фильмлар” ва “энг яхши комедиялар” рўйхатларидан жой олган. 2025 йилнинг сентябрида афсонавий фильмнинг давоми – “Spinal Tap 2: Охири давом этади” (Spinal Tap 2: The End Continues) намойиш этилди. Унинг режиссёри ва сценарий муаллифи ҳам Райнер бўлган.

Райнер кўп фильм суратга олмаган – атиги 20 дан сал кўпроқ, бироқ уларнинг аксарияти томошабинлар севимлисига айланган. 1990 йилда у Стивен Кингнинг шу номли романи асосида суратга олинган “Азоб” (“Мисерй”) фильмини суратга олди. Унда Кети Бейтс ва Жеймс Каан бош ролларни ижро этган. Кейинчалик Кети Бейтс ушбу фильм учун “Энг яхши аёл роли” йўналишида “Оскар” мукофотини қўлга киритган.

Эслатиб ўтамиз, жорий йилнинг февраль ойида икки карра “Оскар” мукофоти совриндори, 95 ёшли актёр Жин Хэкмен ва унинг рафиқаси 63 ёшли пианист Бетси Аракава ўз уйида ўлик ҳолда топилганди.