Гаровдагилар озод қилинмаса, Ғазода қайтадан жанг бошланади – Нетаньяху

Агар ҲАМАС ҳаракати жорий йил 15 февраль куни тушгача гаровга олинганларни озод қилмаса, Исроил Ғазо секторида жанговар ҳаракатларни қайта бошлайди. Бу ҳақда Исроил Бош вазири Биньямин Нетаньяху идорасига таяниб, “The Times of Israil” хабар берди.

Биньямин Нетаньяхунинг маслаҳатчиси Дмитрий Гендельманга кўра, Исроил ҲАМАС гаровга олинганларни 15 февраль куни тушгача озод қилмаса, ҳарбий ҳаракатларни тиклайди. Айни пайтда Исроил армияси кучларини Ғазо секторининг ичкарисида ва унинг чегаралари бўйлаб тўпламоқда.

“Биз барчамиз ўтган шанба куни озод этилган уч нафар гаровга олинганнинг оғир аҳволидан қаттиқ ғазабландик. Шунингдек, биз барчамиз Президент Трампнинг гаровга олинган фуқароларимизни шанба куни тушгача озод қилиш талаби ҳамда унинг Ғазонинг келажаги ҳақидаги инқилобий қарашларини олқишладик. ҲАМАС келишувни бузиш ва гаровга олинган фуқароларимизни озод қилмаслик тўғрисида қарор қабул қилгани ҳақидаги баёнотидан сўнг, кеча кечқурун мен Ғазо секторининг ичкарисида ва атрофида кучларни жамлаш ҳақида кўрсатма бердим. Ушбу операция айни пайтда амалга оширилмоқда ва яқин вақт ичида якунланади”, дейилади Нетаньяху баёнотида. 

Шунингдек, Нетаньяхуга кўра, агар ҲАМАС гаровга олинган исроилликларни 15 февраль куни тушгача қайтармаса, ўт очишни тўхтатиш бекор қилинади ва Исроил ҲАМАС тўлиқ тор-мор этилгунга қадар шиддатли жанговар ҳаракатларни қайта бошлайди. 

Маълумки, 10 февраль куни ҲАМАС ҳарбий қаноти матбуот котиби Абу Убайда ҳаракат Ғазо секторида гаровга олинган ва 15 февраль куни ватанига қайтиши керак бўлган янги гуруҳни озод қилиш жараёнини кейинга сурганини маълум қилди. ҲАМАСнинг фикрича, Исроил “анклав жанубидан шимолга кўчирилганларни қайтаришни кечиктириб, Ғазога қарата ўт очган ва барча турдаги инсонпарварлик ёрдамларини керакли миқдорда етказиб бера олмаганида” келишув шартларини бузган.

Қайд этиш жоиз, кеча, 11 февраль куни АҚШ Президенти Дональд Трамп ҳам ҲАМАСни барча гаровга олинганларни озод қилишга чақирди. Унга кўра, агар бу амалга ошмаса, Ғазо секторида ўт очишни тўхтатиш тартиби бекор қилинади. Шунингдек, Трамп ҲАМАСнинг гаровга олинганларни қисмларга бўлиб эмас, балки бутунлай озод қилиши кераклигини таъкидлаган.

“Шанба куни соат 12:00 да ҳамма гаровга олинганлар озод қилиниши керак, акс ҳолда, мен айтган бўлардимки, ҳақиқий дўзах бошланади”, деган Трамп.

Лекин, ҲАМАС ҳаракати Дональд Трампнинг ушбу талабини рад этди. ҲАМАС матбуот котиби Сами Абу Зуҳрийнинг айтишича, январь ойида Исроил билан эришилган ўт очишни тўхтатиш келишуви гаровга олинганларнинг озод этилишини кафолатлашнинг ягона йўли.

Унинг сўзларига кўра, таҳдидлар тили ўринсиз ва вазиятни янада мураккаблаштиради.

Эслатиб ўтамиз, 19 январь куни Исроил ва ҲАМАС Ғазо секторида ўт очишни тўхтатиш бўйича келишувга эришганди. Ушбу келишув шартларига кўра, 33 нафар исроиллик гаровга олинган шахс қарийб 1900 нафар, аксарияти Исроил қамоқхоналарида сақланаётган фаластинлик маҳбусларга алмаштирилиши керак эди. 

8 февраль куни гаровга олинганларни маҳбусларга алмаштиришнинг бешинчи босқичи якунланди: уч нафар исроиллик гаровга олинган шахс озод қилинди ва 183 нафар фаластинлик маҳбус қўйиб юборилди. Умуман олганда, ҲАМАС 16 нафар исроилликни озод қилди, яна 17 нафари ҳаракат қўлида қолмоқда.

Исроил маълумотларига кўра, ушбу 17 кишидан саккиз нафари ҳалок бўлган, яъни Исроил яна тўққиз кишининг озод қилинишини кутмоқда. Шанба куни ҲАМАС уч нафар исроилликни озод қилиши керак эди, бироқ ташкилот ушбу босқични номаълум муддатга кечиктириш қарорига келганини эълон қилди. У бунга сабаб сифатида Исроил томонидан келишув шартларининг бажарилмагани, жумладан, муайян талабларнинг бузилганини кўрсатди.

9 февраль куни эса Исроил Ғазо секторини шимолий ва жанубий қисмларга ажратиб турган Нетзарим коридоридан ўз қўшинларини олиб чиқишни якунлагани хабар қилинди.