Исроил қўшинлари Ғазодаги асосий йўлакдан чиқиб кетди

Исроил Ғазо секторининг марказини ажратиб турувчи Нетзарим коридоридан ҳарбийларини олиб чиқди. Бу ҳақда “Associated Press” хабар берди.

Исроил ҳарбийлари бу ҳудудни Исроил ва ҲАМАС гуруҳи ўртасида имзоланган ўт очишни тўхтатиш келишуви доирасида тарк этган.

Жорий йил январь ойи охирида Исроил аскарлари Нетзарим йўлагининг ғарбий қисмини тарк этган эди. Энди эса шарқий қисмидан ҳам чиқиб кетди. Ҳарбийлар чиқиб кетганидан сўнг фаластинликлар йўлакнинг шарқий қисмига кела бошлаган.

Маълумот учун, Нетзарим йўлаги Ғазо секторини шимолий ва жанубий қисмларга ажратиб туради. Исроил уруш давомида ушбу ҳудудни ҳарбий зона сифатида ишлатган. Ўт очиш тўхтатилгач, Исроил фаластинликларга ушбу йўлакдан ўтишга рухсат бера бошлади ва улар Ғазонинг шимолидаги уйларига қайтиш имконига эга бўлди.

Исроил ва ҲАМАС ўртасида имзоланган ўт очишни тўхтатиш келишувига кўра, Исроил ҳарбийлари сулҳ бошланганининг 21-кунида Нетзарим йўлагини тарк этиши лозим эди. Шу билан бирга, Исроил аскарлари Ғазо сектори ва Исроил чегараси бўйлаб узунлиги бир километргача бўлган буфер зонасида қолиши мумкин. Исроил кучлари ҳозирча Филадельфия йўлагида – Ғазо сектори ва Миср чегараси бўйлаб жойлашган ҳудудда қолмоқда. Келишувга мувофиқ, Исроил ушбу йўлакдан сулҳнинг 50-кунида чиқиб кетиши лозим.

Эслатиб ўтамиз, Исроил ва ҲАМАС сулҳ доирасида 19 январдан бери беш маротаба асир алмашди. Сўнгги алмашинув 8 февраль куни бўлиб ўтган бўлиб, унда ҲАМАС уч нафар гаровдагиларни қўйиб юборган, Исроил эса 183 нафар фаластинлик маҳбусни озод қилган.