Гаитида вазият жиддий. Жиноий тўдалар полиция академиясига ҳужум қилди

Кеча, 5 март куни Гаити Бош вазири Ариэль Анрига қарши уруш эълон қилган жиноий тўдалар мамлакат полиция академияси ва асосий аэропортига ҳужум қилди. Анрининг чет эл сафаридан қайтаётган самолёти қўшни Пуэрто-Рико оролига қўнди. Бу ҳақда BBC хабар берди.

9 та жиноий гуруҳ конгломерати раҳбари, “Барбекю” лақабли собиқ полициячи Жимми Шеризье агар Бош вазир ҳокимиятдан кетмаса, мамлакатда уруш бошланишини айтди.

5 март куни эрта тонгда тўдалар Гаити пойтахти Порт-о-Пренсдаги 800 дан ортиқ курсант таҳсил олаётган полиция академиясига ҳужум қилди. Полиция ҳужум қайтарилганини эълон қилди.

Шунингдек, мамлакатнинг асосий аэропорти – Порт-о-Пренсдаги Туссен Лувертура халқаро аэропорти яқинида ҳам ўқ овозлари эшитилди. 250 кубалик аэропортдан учиб кетишга уринди, бироқ бунга эриша олмади.

"Биз самолётга чиқмоқчи эдик, лекин самолётда ўқдан қолган тешик топилди", дейди йўловчилардан бири WhatsApp орқали AFP’га.

Гаити Бош вазири Ариэль Анри ўтган ҳафта аввал Гаянадаги минтақавий форумга, сўнгра Кенияга учиб, Гаитига халқаро полиция-ҳарбий контингентни жўнатиш тўғрисидаги битимни имзолашга уринди.

Мамлакатда вазият кескинлашгандан сўнг, бир неча кун давомида Ариэль Анрининг қаерда экани ҳақида ҳеч нарса маълум эмас эди, бироқ кеча Америка Қўшма Штатларининг махсус ҳуқуқларга эга бўлган Пуэрто-Рико ороли расмийлари Анрининг самолёти у ерга қўнганини тасдиқлади.

Бунгача Нью-Жерсидан учаётган Бош вазирга Доминикан Республикаси қўнишга рухсат бермаган. Бу мамлакат Гаити жойлашган Ҳиспаниола оролининг катта қисмини эгаллайди.

Эслатиб ўтамиз, Бош вазир йўқлигида “Барбекю” унга қарши уруш эълон қилганди. 2 март куни тўдалар Порт-о-Пренсдаги бир неча полиция бўлимлари ҳамда иккита қамоқхонага ҳужум қилди, улардан бир неча минг маҳбус озод қилинди. Шундан сўнг ҳукумат фавқулодда ҳолат ва комендантлик соати эълон қилди.