Францияда ўқувчилар намойиши: мактабларга ўт қўйилди (видео)

Францияда ўқувчилар намойишлари вақтида камида икки мактабда ёнғин чиқди. Бу ҳақда “Reuters” хабар берди.

Аввалроқ, Францияда 3 700 га яқин мактабдан 400 тасида намойишлар ёки тартибсизликлар кузатилгани ҳақида хабар берилган эди. Ўқувчилар синфлардаги ўқувчилар сонининг кўплиги, ўқитувчилар етишмаслиги ва дарс жадвалларининг ҳаддан ташқари тиғизлигига қарши чиққан эди.

Қайд этилишича, намойишлар давомида Марсел шаҳридаги Сен-Экзюпери мактабида ёнғин содир бўлган. Ёнғинни ўчириш учун борган ўт ўчирувчиларни юзлаб ёшлар қуршаб олган ва уларни машинани тарк этишга мажбур қилган. Шундан сўнг, ўт ўчириш машинаси ёқиб юборилган.

Шунингдек, Марселдаги Виктор Гюго лицейи директори устига бензин сепилган ва у жароҳатланган. Нант шаҳридаги Нелсон Мандела мактабида ҳам ёнғин чиққан. Ёнғин назоратга олинган ва ҳодиса оқибатида ҳеч ким жароҳатланмаган. Бинодаги одамлар эвакуация қилинган, мактабга бориши керак бўлган ўқувчилар эса ортга қайтарилган.

Намойишлар ўтган ҳафтада бошланган. Ўқувчилар ўқитувчилар етишмаслиги, таълим учун ресурсларнинг камлиги ва мактаблардаги шароитларнинг ёмонлигига норозилик билдирмоқда.

Намойишлар давомида ўнлаб одамлар жароҳатланган, юзлаб киши (аксарияти ўсмирлар) ҳибсга олинган. Франция Бош вазири Себастьян Лекорню идораси 1 октябрь куни намойишлар юзасидан йиғилиш ўтказган.

Ички ишлар вазири Лоран Нюнеснинг айтишича, айрим ҳудудларда тартибсизлик келтириб чиқараётган шахслар зўравонликка ундаш мақсадида бир мактабдан бошқасига ўтмоқда. Таълим вазири Эдуар Жеффрей эса намойишчилар мактаб биноларига киришни тўсиб қўйган ҳолатларда дарсларни масофавий шаклда ўтказишга чақирган.

Эслатиб ўтамиз, аввалроқ Францияда ўқувчиларнинг таълим тизимидаги муаммоларга қарши норозиликлари вақтида 440 киши ушлангани ҳақида хабар берилган эди.