Францияда сўнгги 80 йилдаги энг йирик ёнғин содир бўлди

Жанубий Францияда кучли ўрмон ёнғини юз бермоқда, унда бир киши ҳалок бўлган, яна бир одам бедарак йўқолган. Бу ҳақда “Le Parisien” хабар берди.

Кеча, 5 август куни Франциянинг жанубидаги Од департаментида катта ўрмон ёнғинлари бошланди. Камида бир киши ҳалок бўлган, яна тўққиз киши жароҳатланган, автомобиллар ва биноларга зарар етган. Ёнғинни ўчиришга 1800 дан ортиқ ўт ўчирувчи ва мамлакатдаги барча ёнғин самолётлари жалб қилинган.

Ёнғин маҳаллий вақт билан соат 16:00 да бошланган. Кучли шамол ва қуруқ об-ҳаво сабабли бир кеча-кундузда олов Ўрта ер денгизи соҳилидаги Корбер минтақасига тарқалиб, камида 15 минг гектар майдондаги ўсимликларни йўқ қилган.

Сен-Лоран-де-ла-Кабрерис қишлоғида уйидан эвакуация қилишларига қаршилик қилган ёши катта аёлнинг жасади топилган. Яна бир фуқаро бедарак йўқолган, деб эълон қилинган. Маҳаллий маъмуриятга кўра, яна бир фуқаро оғир куйиш жароҳатлари олган, саккиз одам енгил тан жароҳати олган.

Ёнғин камида 25 та турар-жой биносини йўқ қилган ёки шикастлаган. Икки лагерь ва юзлаб аҳоли эвакуация қилинган. Францияни Испания билан боғловчи А9 автомагистрали оралиғидаги 75 км узунликдаги қисм, шунингдек бошқа маҳаллий йўллар бир неча соатга ёпилган. Ёнғин сабабларини аниқлаш бўйича тергов бошланган.

ОАВ ушбу ёнғинни бу ёзги Франциядаги энг кучлиси деб атаган. Фақат июнь ойидан бошлаб Ўрта ер денгизи соҳилида 9 мингга яқин ёнғин ҳолати қайд этилган. “Le Parisien” газетаси эса Франция Экология вазирлигига таяниб, бу ёнғинни 1949 йилдан бери мамлакатдаги энг каттаси деб атади. Ўшанда 80 минг гектар ўрмон ёниб кетган эди.

2022 йилда эса Жирондада 30 минг гектар ўрмон ёнган эди, аммо бу бир нечта алоҳида ёнғинлар оқибатида бўлган.

Эслатиб ўтамиз, аввалроқ Канаданинг Манитоба провинциясининг жанубида содир бўлган йирик ўрмон ёнғинлари оқибатида икки киши ҳалок бўлганди.