Франция тез орада Фаластинни тан олиши мумкин – Макрон 

Франция Президенти Эммануэль Макрон июнь ойида ўзи ҳамраислик қиладиган икки давлат ечими бўйича халқаро конференция доирасида Франция яқин ойларда Фаластин давлатини тан олиши мумкинлигини айтди. Макрон Фаластин давлатини тан олиш масаласини Мисрга икки кунлик ташрифидан сўнг “France 5” телеканалига берган интервьюсида кўтарди.

“Биз (Фаластинни) тан олиш томон ҳаракат қилишимиз керак ва биз бунга яқин ойларда эриша оламиз”, деди Макрон июнь ойида Саудия Арабистони билан бирга мезбонлик қиладиган икки давлат ечимига бағишланган халқаро конференцияга ишора қилиб.

Президентнинг айтишича, конференция Фаластинни тан олиш масаласини ниҳоят ҳал қилишни режалаштирмоқда.

Франция Президенти 6-7 апрель кунлари Мисрга расмий ташрифи чоғида Саудия Арабистони ҳамраислигида икки давлат ечими бўйича халқаро конференция ташкил этишини маълум қилди.

Маълумот учун, 2023 йилнинг 7 октябрь куни Исроил Ғазога ҳужумларини бошлаганидан бери Франциядаги мухолифат Фаластин давлатини зудлик билан тан олиш талабларини кучайтирди. 2024 йилда Макрон Фаластин давлатини тан олиш Франция учун “табу” эмаслигини айтди.

Эслатиб ўтамиз, ўтган йили 28 май куни Испания, Ирландия ва Норвегия Фаластин давлатини расман тан олиб, дунёнинг бошқа 140 давлатига қўшилганди.