Eronning Qoraqalpog‘istondagi voqealar bo‘yicha munosabati ochiqlandi

Eron Islom Respublikasi O‘zbekiston rahbariyatining mamlakatda tinchlik, osoyishtalik va millatlararo totuvlikni ta’minlash borasidagi sa’y-harakatlarini to‘liq qo‘llab-quvvatlaydi. Bu haqda Eron Tashqi ishlar vaziri Husayn Amir-Abdullahiyon O‘zbekiston Respublikasi Tashqi ishlar vaziri v.b. Vladimir Norov bilan suhbatda ma’lum qilgan. 

Ikki davlat tashqi idoralari rahbarlari o‘rtasidagi telefon suhbati bugun, 5 iyul kuni bo‘lib o‘tgani aytilmoqda. 

“Husayn Amir-Abdullahiyon Eron tomoni O‘zbekiston rahbariyatining mamlakatda tinchlik, osoyishtalik va millatlararo totuvlikni ta’minlash borasidagi sa’y-harakatlarini to‘liq qo‘llab-quvvatlashini tasdiqladi.  

Eron tashqi ishlar vaziriga Qoraqalpog‘istondagi mavjud holat, vaziyatning beqarorlashuviga yo‘l qo‘ymaslik, mintaqada jamoat tartibini mustahkamlash bo‘yicha ko‘rilayotgan chora-tadbirlar, O‘zbekistondagi Konstitutsiyaviy islohotning mazmuni va asosiy yo‘nalishlari to‘g‘risida atroflicha ma’lumot berildi”, deyiladi O‘zbekiston TIV axborotida. 

Muloqotda O‘zbekiston-Eron ko‘p qirrali munosabatlarini, eng avvalo, siyosiy-diplomatik, savdo-iqtisodiy, madaniy-gumanitar sohalardagi aloqalarni kengayishning dolzarb masalalari ko‘rib chiqilgan. 

Bo‘lib o‘tajak tadbirlarning turli jihatlari yuzasidan fikr almashilgan. 

Tashqi siyosat mahkamalari rahbarlari bir-birlarini yaqinlashib kelayotgan Qurbon hayit bayrami bilan tabriklab, O‘zbekiston va Eronning xalqlariga farovonlik va ravnaq tilaganlar.