Эрон АҚШ санкцияларини қоралади

Эрон Ташқи ишлар вазирлиги сўзловчиси Исмоил Багай АҚШ Молия вазирлигининг Эрон нефтини Хитойга етказиб беришга ёрдам берган шахслар, юридик шахслар ва кемаларга нисбатан санкциялар жорий этиш ҳақидаги қарорини кескин қоралади. Бу ҳақда ИРНА хабар берди.

У АҚШнинг Эрон нефть саноатига қарши янги санкцияларини мутлақо асоссиз ва халқаро қоидалар ҳамда стандартларга зид деб атади.

“АҚШ янги маъмуриятининг Эроннинг ўз иқтисодий шериклари билан қонуний савдосига тўсқинлик қилиш орқали Эрон халқига босим ўтказиш қарори Оқ уй маъмурияти учун халқаро жавобгарликни келтириб чиқарадиган ноқонуний ва бузувчи ҳаракатдир”, деган у.

Матбуот котибининг сўзларига кўра, Эрон бу каби бир томонлама ҳаракатлар оқибатлари учун АҚШни жавобгар деб ҳисоблайди.

Қўшма Штатлар кеча, 6 февраль куни Эроннинг нефть саноатига қарши янги санкциялар киритган эди.

“Қўшма Штатлар Эроннинг бузғунчи ва беқарорлаштирувчи хатти-ҳаракатларига тоқат қилмайди ва бугун ноқонуний даромадларни Эрон ҳарбийларига ўтказувчи халқаро тармоқни санкция қилмоқда. Бу тармоқ Эрон Бош штабини ўзининг олдинги компанияси Sepehr Energy орқали молиялаш учун Хитойга миллионлаб баррель Эрон нефтининг ноқонуний жўнатилишига ёрдам беради”, дея баёнот берган эди АҚШ Молия вазирлиги.

Вашингтон, шунингдек, Эроннинг Хитойга нефть ташишда фойдаланилаётган “соя флоти”га қарши ҳам санкциялар жорий қилмоқда. Америка Молия вазирлиги, шунингдек, Эрон нефтдан тушган даромадларни ядровий дастурини молиялаштириш ва қўшни мамлакатлардаги терроризмни қўллаб-қувватлаш учун ишлатаётгани, шу сабабли Теҳронга қарши санкциялар давом этаётганини даъво қилмоқда.

Эслатиб ўтамиз, аввалроқ “The Wall Street Journal” нашри Эрон Хитойдан 1000 тоннадан ортиқ кимёвий моддалар импорт қилишга тайёрланаётгани, ушбу моддалар 960 тонна аммиак перхлоратига айлантирилиши мумкинлиги, улар эса баллистик ракеталар учун қаттиқ ёқилғи ишлаб чиқаришнинг асосий компонентларидан бири ҳисобланиши ҳақида ёзганди.