Эрон Ҳормуз орқали ўтишнинг янги қоидаларини жорий қилди

Бугун, 23 март куни Эрон Мудофаа кенгаши Ҳормуз бўғози орқали ўтишнинг янги қоидалари жорий этилганини эълон қилди ва Форс кўрфазидаги денгиз йўлларини миналашга тайёрлигини яна бир бор эслатиб ўтди. Бу ҳақда IRNA хабар берди. 

Ҳужжатга кўра, дунёнинг асосий нефть артерияси орқали хавфсиз ўтиш ҳуқуқи энди бевосита Эрон расмийлари билан ҳамкорлик даражасига боғлиқ бўлади.

“Можарода иштирок этмаётган давлатлар ўз кемалари хавфсизлигини таъминлаш учун Эроннинг ваколатли органлари билан тўлиқ мувофиқлаштириш жараёнидан ўтишлари шарт”, дейилади хабарда.

Кенгаш, шунингдек, Эрон ороллари ёки соҳилларига қарши ҳар қандай тажовуз уриниши содир бўлган тақдирда, Эрон ҳарбийлари Форс кўрфазидаги барча кириш йўллари ва алоқа линияларини кенг кўламда миналашга киришишини билдирган.

“Бу мақсадда замонавий денгиз миналаридан, жумладан, қирғоқдан қўйиб юбориладиган сузувчи миналардан фойдаланиш режалаштирилган”, дея аниқлик киритган Кенгаш.

Баёнотда айтилишича, ушбу сценарий амалга оширилган тақдирда, Форс кўрфази узоқ муддатга амалда ёпиқ ҳудудга айланади ва оқибатлар, жумладан, халқаро кема қатновининг блокланиши учун барча масъулият таҳдид ташаббускори зиммасига юкланади.

Эслатиб ўтамиз, аввалроқ Эрон Мудофаа кенгаши АҚШ Эрон соҳилларига ёки оролларига ҳужум қилган тақдирда, Форс кўрфазидаги барча денгиз йўлларини миналаб ташлашини маълум қилган эди. Кейинчалик АҚШ Президенти Дональд Трамп сўнгги икки кун ичида Эрон томони билан музокараларда иштирок этганини ва шундан сўнг ҳужумларни беш кунга кечиктирганини айтди.