Трамп Эрондан товон ундирмоқчи

АҚШ Президенти Дональд Трамп Эрондан, жумладан, америкалик ҳарбийларнинг ҳалок бўлгани учун ҳам товон пули ундириш ниятида эканини маълум қилди.

“Мен Эрон Ислом Республикаси вакилларининг сўнгги беш ойлик ҳарбий можаро давомида етказилган зарар учун товон пули талаб қилаётганини кўряпман, ваҳоланки, бу бизнинг бирорта музокара ёки учрашувимизда тилга олинмаган эди. Аммо бу қизиқ ғоя, чунки энди мен ҳам Эрондан йўл четидаги миналар ва улар машҳур бўлган кўплаб тўқнашувлар оқибатида ҳалок бўлган ва оғир яраланган барча инсонлар учун, жумладан, [Американинг] USS Cole эсминецида қурбон бўлганлар ва жангларда ҳалок бўлган минглаб бошқаларнинг оилалари учун товон пули талаб қиламан. Буларнинг барчаси дастлаб генерал [Қосим] Сулаймоний (Ислом инқилоби посбонлари корпусининг “Ал-Қудс” махсус кучлари қўмондони, 2020 йилда америкаликлар томонидан ўлдирилган –таҳр.) бошчилигида содир этилган”, деб ёзди Америка етакчиси Truth Social ижтимоий тармоғида.

Унинг сўзларига кўра, АҚШ Эрон раҳбарияти республикада сўнгги 50 йил ичида бўлиб ўтган норозилик намойишлари иштирокчиларининг оилаларига ҳам товон тўлаши керак деб ҳисоблайди. 

“Мен ўз вакилларимга келажакдаги барча музокараларда бу масалани қатъий кун тартибига қўйишни топширдим”, деди Трамп.

Жорий йилнинг март ойида у 2000 йилда “Ал-Қоида” террорчилик гуруҳи жангарилари томонидан амалга оширилган Американинг Cole эсминецидаги портлаш учун масъулиятни амалда Эронга юклашга уринган эди.

АҚШ ва Исроил 28 февраль куни Эронга қарши ҳарбий амалиёт бошлади. Июнь ойида Вашингтон ва Теҳрон барча жабҳаларда, жумладан, Ливанда ҳам жанговар ҳаракатларни зудлик билан тўхтатишни кўзда тутувчи ўзаро англашув меморандумини имзолади. Бироқ 8 июлга ўтар кечаси АҚШ Эронга қарши кенг кўламли зарбаларни қайта тиклаб, уни Ҳормуз бўғозига оид келишув шартларини бузганликда айблади.