Эрдўғаннинг рафиқаси унинг қўлини ўпмоқчи бўлган Макронга қаршилик кўрсатди (видео)

Кеча, 7 июль куни Франция Президенти Эммануэль Макрон НАТОнинг Анқарадаги саммити доирасида ўтказилган расмий кутиб олиш маросимида Туркия Президенти Ражаб Тойиб Эрдўғаннинг рафиқаси Эмине Эрдўғаннинг қўлини ўпишга ҳаракат қилди. Бу ҳақда “Habertürk” хабар берди.

Маросим чоғида Макрон Эмине Эрдўған билан саломлашиш учун яқинлашган. У биринчи хонимнинг қўлини ўпишга уринган, бироқ Эмине Эрдўған қўлини тортиб олган. Шундан сўнг улар одатдагидек қўл бериб кўришган.

Мазкур ҳолат ижтимоий тармоқларда ҳам кенг муҳокамаларга сабаб бўлмоқда.

Турк маданиятида инсонларнинг қўлини ўпиш ва уни пешонага теккизиш ҳурмат рамзи ҳисобланади. Шу боис Эммануэль Макроннинг Эмине Эрдўғанга нисбатан қилган ҳаракати ҳам турк анъаналарига ҳурмат кўрсатиш истаги билан боғлиқ бўлиши мумкин. Бироқ Франция томони бу борада расмий изоҳ бермаган, шунинг учун унинг ҳаракатлари номаълумлигича қолмоқда.

Франция Президенти бир ҳафтадан буён жамоат жойларида қора кўзойнакда кўриниш бераётган эди. Шунингдек, у НАТО саммитига ҳам қора кўзойнак тақиб келган. Маҳаллий ОАВларга кўра, бунга унинг кўзи билан боғлиқ муаммо сабаб бўлган.

Маълумот учун, НАТОнинг 36-саммити 7–8 июль кунлари Туркия пойтахти Анқарада бўлиб ўтмоқда. Саммитнинг асосий мавзулари мудофаа харажатларини ошириш, Украинани қўллаб-қувватлаш ва Европа хавфсизлиги масалаларидан иборат.

Эслатиб ўтамиз, жорий йилнинг 6 июль куни Франция Президенти Эммануэль Макрон Сурияга ташриф буюрган эди. Шундан сўнг Эммануэль Макрон Сурия Президенти Аҳмад аш-Шара билан учрашиш учун Президент саройига кирган вақтда “Four Seasons” меҳмонхонаси яқинида портлашлар ҳам содир бўлган.