Макрон Асад ҳокимияти ағдарилгандан сўнг илк бор Сурияга борди (видео)

Франция Президенти Эммануэль Макрон кеча, 6 июль куни Сурияга ташриф буюрди. Бу ҳақда “Reuters” хабар берди.

Қайд этилишича, бу 2024 йилда Президент Аҳмад аш-Шараа бошчилигидаги исёнчилар Башар Асад ҳокимиятини ағдарганидан буён Европа Иттифоқи давлат раҳбарининг Дамашққа илк ташрифи ҳисобланади. Ташриф Аҳмад аш-Шараа раҳбарлигида Суриянинг геосиёсий мавқеи ўзгарганини кўрсатади. Собиқ “Ал-Қоида” қўмондони бўлган Шараа Асад даврида мамлакатдан узоқлашган Ғарб ва Яқин Шарқ давлатлари билан яқин алоқалар ўрнатиб, 13 йиллик уруш вайрон қилган мамлакатни тиклашга интилмоқда.

“Мен бу ерга Франциянинг Сурия халқига бўлган садоқатини тасдиқлаш учун келдим. Суверен, хилма-хиллигини сақлаган ва қўшнилари билан тинч-тотув яшайдиган Сурия учун. Биргаликда барқарорлик ва тинчликнинг янги саҳифасини очайлик”, деб ёзган Макрон X ижтимоий тармоғида.

Маълум қилинишича, Дамашқ аэропортида уни Ташқи ишлар вазири Асад аш-Шайбони кутиб олган. Ташрифнинг асосий мавзуларидан бири Сурияни қайта тиклаш бўлади. Макронга TotalEnergies ва CMA CGM компаниялари раҳбарлари ҳамроҳлик қилмоқда.

Франция томонининг билдиришича, Макрон эркин, кўп миллатли ва барча жамоалар ҳуқуқларини ҳурмат қиладиган Сурияни қўллаб-қувватлашини таъкидлайди ҳамда турли қатлам вакиллари билан учрашади.

Эслатиб ўтамиз, Аҳмад аш-Шараа ўтган йили Францияга ташриф буюриб, Асад ағдарилганидан кейин Европага биринчи сафари доирасида Макрон билан учрашган эди. Макрон Ғарб санкцияларини бекор қилишни фаол қўллаб-қувватлаган етакчилардан бири бўлган. Санкцияларнинг катта қисми ўтган йили бекор қилинган.

Франция Президенти маъмурияти вакили Макрон Шараага Сурия ҳеч қандай шароитда Ливанга қўшин киритмаслиги кераклигини очиқ айтганини билдирган. Унинг сўзларига кўра, Шараа ҳам ҳар қандай илтимос ёки босимга қарамай бундай қадам ташламаслигини маълум қилган.

Дипломатик манбаларга кўра, музокараларда терроризмга қарши кураш ва дипломатик муносабатларни юқори босқичга кўтариш масалалари муҳокама қилинади. Ҳозир Франция Сурияда доимий элчига эмас, балки Бейрутда фаолият юритувчи вақтинчалик ишончли вакилга эга.

Европа Иттифоқи 2025 йил май ойида Сурияга нисбатан иқтисодий санкцияларнинг барчасини бекор қилган. Шу билан бирга, Башар Асаднинг собиқ маъмурияти ва хавфсизлик билан боғлиқ айрим шахслар ҳамда ташкилотларга нисбатан чекловлар сақлаб қолинганди. Май ойида ЕИ Сурия мудофаа ва ички ишлар вазирликларини ҳам ўз ичига олган еттита ташкилотни санкциялар рўйхатидан чиқарганди.

2025 йил январь ойида Қатар амири шайх Тамим бин Ҳамад Ол Соний Асад ағдарилганидан кейин Сурияга ташриф буюрган биринчи хорижий давлат раҳбари бўлган. Шу ойда Европа комиссияси раиси Урсула фон дер Ляйен ҳам Дамашққа борган. Украина Президенти Владимир Зеленский эса апрель ойида Сурияга ташрифи чоғида Аҳмад аш-Шараа билан учрашган.

Маълумот учун, Франция 1920–1946 йилларда Сурияни Франция мандати остида бошқарган.