Эпштейннинг Нью-Мексикодаги ранчоси янги тергов объекти бўлади

АҚШ конгрессменлари марҳум молиячи Жеффри Эпштейнга тегишли бўлган “Зорро” ранчоси фаолияти бўйича тергов бошлади. Бу ҳақда CNN телеканали хабар берди.

“Нью-Мексико штатининг қонунчилик комиссияси “Зорро” ранчосидаги тергов доирасида ўндан ортиқ чақирув қоғозларини юборади”, дейилади хабарда.

Телеканал маълумотларига кўра, комиссия бир қатор федерал ва маҳаллий идоралардан, жумладан, АҚШ Адлия вазирлиги, Федерал қидирув бюроси, Эпштейннинг ворислари, бир нечта йирик банклар, шунингдек, Санта-Фе округи шерифи офисидан далилларни йиғишни бошлайди.

Қайд этилишича, қўмита ранчони кўздан кечиришни ва ушбу мулкда зўравонликдан омон қолган жабрланувчилар билан суҳбатлашишни ҳам режалаштирмоқда.

Маълумот учун, “Зорро” ранчоси – Санта-Фе яқинидаги кенг ҳудуд бўлиб, Эпштейннинг кўплаб уйларидан бири ҳисобланади. Ушбу жой молиячининг ёш аёллар ва қизларга нисбатан қилган жиноятлари ҳақидаги кўплаб фитна назарияларининг манбасига айланган. Эпштейннинг айрим қурбонлари ранчо уларни жинсий зўравонликка учратган жойлардан бири бўлганини маълум қилган.

“Шу йилнинг февраль ойида Нью-Мексико бош прокурори Рауль Торрес Эпштейннинг ранчодаги фаолияти бўйича жиноий тергов қайта тикланганини эълон қилган эди, март ойида эса штат расмийлари у ерда тинтув ўтказишга улгуришди. Бироқ у ердан қандай далиллар топилгани ҳозирча номаълум”, дейди CNN.

Эслатиб ўтамиз, аввалроқ америкалик молиячи Жеффри Эпштейннинг яна йигирмага яқин эҳтимолий қурбонлари Париж прокуратурасига мурожаат қилгани ҳақида хабар берилган эди.