Энергетикада муаммо маблағда эмас, тизимнинг бошқарувида! – Шавкат Мирзиёев

Шавкат Мирзиёев энергетика тизимидаги муаммолар соҳага кам пул ажратилганида эмас, балки тизимнинг ўзида эканлигини айтди. Бу ҳақда Президент бугун, 27 июль куни ёқилғи-энергетика тармоғида келгусидаги устувор вазифалар юзасидан ўтказилган видеоселектор йиғилишида сўз очди.

Давлат раҳбари сўнгги ўн йилда энергетика соҳасида жуда катта ислоҳотлар амалга оширилганини, қонун ва қарорлар қабул қилиниб, соҳада хусусий сектор ва хорижий инвесторлар учун йўл очилганини таъкидлаган.

Президент инвесторлар билан бир неча бор шахсан учрашиб, уларнинг таклифларини эшитганини қайд этган. Ҳар бир йирик лойиҳани амалга ошириш учун шароит яратилиб, зарур кафолатлар берилганини билдирган.

Натижада энергетика соҳасига 23 миллиард доллар хорижий инвестиция киритилган ҳамда жойларда 9,5 гигаваттли электр станциялари ишга туширилган. Шу тариқа генерация бўйича ички эҳтиёжни тўлиқ қоплайдиган қувватлар яратилган.

Қайд этилишича, сўнгги йилларда электр ва газ тармоқлари, подстанциялар, трансформаторлар ва газ тақсимлаш қурилмаларини янгилаш учун 30 триллион сўм ажратилган. Бу олдинги 25 йилда йўналтирилган маблағдан 6 карра кўп.

“Очиқ айтиш керак. Энергетикада муаммо маблағда эмас, чунки қанча керак бўлса, топиб беряпмиз. Муаммо тизимнинг бошқарувида!” – деган Президент.

Эслатиб ўтамиз, аввалроқ Президентининг тегишли фармони билан Ўзбекистон Республикаси Энергетика вазири Жўрабек Мирзамаҳмудов лавозимидан озод этилганди.