Энди қамоққа олинганлар 2 соат ичида мажбурий тиббий кўрикдан ўтказилади

Энди қамоққа олинган шахслар тергов ҳибсхонасига жойлаштирилишидан олдин ҳибсхонанинг ўзида мажбурий тиббий кўрикдан ўтказилади. Бу “Жиноят ишини юритиш чоғида қамоқда сақлаш тўғрисида”ги қонунга киритилган қўшимчаларда белгиланган. 

Унга кўра, мажбурий тиббий кўрик қамоққа олинганлар тергов ҳибсхонасига олиб келинган пайтдан эътиборан 2 соат ичида ўтказилади.

Бунда қамоққа олинган шахснинг розилиги билан унинг адвокати ҳам иштирок этиши мумкин.

Мажбурий тиббий кўрикдан ўтказиш натижалари бўйича белгиланган намунадаги тиббий маълумотнома расмийлаштирилади.

Шунингдек, тиббий кўрик чоғида қамоққа олинганнинг танасида жароҳат, шикастланиш ва яралар аниқланганда, улар белгиланган тартибда қайд этилиб, бу ҳақда қамоққа олинганга маълум қилинади ва зудлик билан прокурорга хабар берилади.

Эслатиб ўтамиз, аввалроқ “Миллий тикланиш” партияси битта китоб ўқиган маҳкумнинг жазо муддати 3 кунга қисқаришини назарда тутувчи қонун лойиҳасини ишлаб чиққан эди. Ушбу ташаббус орқали маҳкумларнинг билим ва маданиятини ошириш, уларнинг ижтимоий адаптациясини яхшилаш ва жазо муддатини ўтказиш жараёнида руҳий ва ахлоқий ривожланишга кўмаклашиш кўзда тутилган. Қонун лойиҳасига кўра, тасдиқланган рўйхат бўйича 1 та китоб ўқиган ва белгиланган имтиҳонни топширган маҳкумнинг жазо муддати 3 кунга қисқартирилади.