Депардьени ҳимоя қилган “Брут”нинг уйи деворида қора ёзув пайдо бўлди

Бир гуруҳ санъаткорлар актёр ва режиссёр Депардьенинг тергов иши масаласида унга ён босиб чиқди. Улар орасида бўлган бельгиялик актёр Бенуа Пульворд ҳам одамларнинг танқидига учради. Бу ҳақда “Sudinfo” нашри хабар берди.

Билдирилишича, 50 дан ортиқ маданият арбоблари, жумладан актёр Бенуа Пульворд машҳур француз актёрини ҳимоя қилиб, унга қўйилган айбловларни қоралаган ва айбсизлик презумпциясини эслатиб, қўшма очиқ хатни имзолади.

Шундан сўнг, Ричарднинг уйи деворида Депардьега нисбатан ҳақоратли сўзлар пайдо бўлди. Унда қора бўёқ билан бош ҳарфларда “Биз Депардьени ёқтирмаймиз, у қари чўчқа”, деб ёзилганди.

Маълумот учун, 74 ёшли Депардье Франциянинг энг таниқли юлдузларидан биридир. У актриса Шарлотта Арнольднинг айбловларидан сўнг, Париждаги уйида аёлга нисбатан жинсий зўравонлик қилганликда айбланиб, 2020 йил декабрда терговга тортилганди. Тергов ҳали ҳам давом этмоқда.

Эслатиб ўтамиз, бутун дунёга “Обиликс” роли билан танилган актёр ва маҳоратли режиссёр Жерар Депардье жинсий тажовузда айбланиб, тергов қилинмоқда.

Гап шундаки, дастлаб 2020 йилнинг декабрь ойида актриса Шарлотта Арнольд уни 2018 йилда Париждаги уйида икки марта зўрлаганликда айблаганди. Шундан сўнг актёр устидан тергов ҳарактлари бошланди. Кейинроқ ушбу ишга бошқа одамларнинг ҳам гувоҳликлари қўшилди. Жумладан, француз актрисаси Анук Гринберг жорий йилнинг 12 октябрь куни маҳаллий нашрлардан бирига эксклюзив интервью берди.

Шундан сўнг, Депардьенинг Шимолий Корея ташкил топганининг 70 йиллиги чоғида мамлакатга ташрифи акс этган видеолар судга далил сифатида тақдим этилди. Видеода режиссёрнинг беҳаё хатти-ҳаракатлари акс этган кадрлар ҳам бор. Жумладан, Депардье аёллар ва 10 ёшли қизча олдида беҳаё товушлар чиқаргани ва уятли мавзуларда гапираётганини кўриш мумкин.

Ушбу воқеалар фонидa Депардьени Франциянинг энг олий мукофоти – “Фахрий легион” орденидан ҳам маҳрум қилиш масаласи кўриб чиқилди. Аммо Франция Президенти Эммануэль Макрон актёрга нисбатан бундай муносабатга қарши чиқди ва Депардьени ҳимоя қилди.

Шунингдек, Жерар Депардьенинг оиласи унга нисбатан актрисалар томонидан қўйилган жинсий тажовуз ҳақидаги айбловларга жавоб қайтарди.