Bugundan tabiiy gaz uchun bazaviy me’yor 100 kubga tushirildi

Bugun, 1 aprel kunidan boshlab isitish mavsumida tabiiy gaz uchun joriy qilingan 500 kub metrlik bazaviy me’yor 100 kub metrga tushiriladi. Bu haqda “Hududgazta’minot” aksiyadorlik jamiyati xabar berdi.

Ma’lum qilinishicha, Vazirlar Mahkamasining 2024 yildagi 204-sonli qarori bo‘yicha mazkur shkala mart oyida o‘zgarishi belgilangan. Biroq mart oyida havo haroratining past bo‘lishi va odatdagidan ko‘ra sovuqroq kelishi munosabati bilan davlat rahbarining topshirig‘iga muvofiq, Vazirlar Mahkamasining tegishli qarori bilan isitish mavsumi uchun belgilangan 500 kubometr bazaviy me’yor 2025 yilning 1 apreligacha uzaytirilgan.

Shunday qilib, bugundan 1 maygacha aholiga gaz iste’moli uchun tariflar quyidagicha:

• 100 kub metrgacha – 650 so‘m;
• 101 kub metrdan 2500 kub metrgacha – 1500 so‘m;
• 2500 kub metrdan 5000 kub metrgacha – 1950 so‘m;
• 5 ming kub metrdan 10 ming kub metrgacha – 2275 so‘m;
• 10 ming kub metrdan va undan yuqori iste’mol uchun – 2600 so‘mdan bo‘ldi.

1 apreldan elektr energiyasi va gaz bo‘yicha yangi tariflar kuchga kirishi kerak edi. Prezident esa aholi, iqtisodiyot tarmoqlari va tadbirkorlik sub’ektlarini yoqilg‘i-energetika resurslari bilan ishonchli tarzda ta’minlash, shuningdek, aholi va tadbirkorlik sub’ektlarini qo‘llab-quvvatlash maqsadida Vazirlar Mahkamasiga  yangi tariflar avval rejalashtirilganidek 1 apreldan emas, 1 maydan kuchga kirishi bo‘yicha topshiriq berdi.

Shuning bilan, 1 maydan aholiga gaz iste’moli uchun tariflar quyidagicha bo‘ladi

• 100 kubometrcha — 1000 so‘m;
• 101 dan 2500 kubometrgacha — 1800 so‘m.