Британия монархлари пул тежаш учун Виктория поездидан воз кечяпти

Британия қироллик оиласи аъзолари ҳаракатланиб келган темирйўл таркиби 2027 йилга бориб фойдаланишдан чиқарилади. Бу чоралар сарф-харажатларни қисқартириш доирасида амалга оширилмоқда. Бу ҳақда Букингем саройи эълонига таяниб, BBC хабар берди.

BBC’нинг қироллик оиласи бўйича мухбири Шон Кофланнинг ёзишича, бу эълон қироллик саройи молияси бўйича йиллик ҳисобот билан бир пайтда тақдим этилган. Унда айтилишича, жорий йилнинг февраль ойида Глостерширдан Стаффордширга, кейин Лондонга қироллик поезди орқали икки кун давом этган сафар 44 минг фунт стерлингдан кўпроққа тушган.

Қирол Чарльз III ва қироллик оиласининг бошқа аъзолари мамлакат бўйлаб саёҳат қилишда оддий йўловчи поездлар ва икки вертолётдан фойдаланишда давом этади.

Қайд этилишича, тўққизта вагондан иборат қироллик поезди фойдаланишдан чиқарилгач, жамоатчиликка намойиш этилиши мумкин. Қироллик саройи молиясига масъул бўлган Жеймс Чалмерс поезд ўн йиллар давомида миллий ҳаётнинг бир қисми бўлиб келганини айтиб, “энди у билан илиқ хайрлашиш вақти келди”, дея таъкидлаган.

Маълумот учун, ушбу темирйўл таркиби қирол Чарльз III’нинг катта бувиларидан бири бўлган қиролича Виктория давридан бери фойдаланиб келинган. Айнан у 1869 йилда илк вагонларга буюртма берган эди. Ҳозирда қироллик поезди тўққиз вагондан иборат бўлиб, охирги вагон унга 1986 йилда қўшилган. 2024 йил давомида поезд атиги икки маротаба ишлатилган ва ушбу сафарлар жами 80 минг фунт стерлингга тушган. 

Эслатиб ўтамиз, аввалроқ 2020 йилда қироллик оиласи вакили вазифаларини бажаришдан воз кечган Британия қироли Чарльз III нинг кенжа ўғли шаҳзода Гарри BBC’га берган интервьюсида оиласи билан ярашишни истаётганини маълум қилганди.