“Бока Хуниорс” бош мураббийи вафот этди

Кеча, 8 октябрь куни Аргентинанинг машҳур “Бока Хуниорс” футбол клуби бош мураббийи Мигель Анхель Руссо вафот этди. 69 ёшли аргентиналик мутахассис саратон касаллиги билан курашиб келаётган эди. Бу ҳақда клуб матбуот хизмати хабар берди.

“Мигель бизнинг клубимизда ўчмас из қолдиради. У доимо қувонч, илиқлик ва фидойилик намунаси сифатида ёдда қолади”, дейилади клуб баёнотида.

Сўнгги пайтларда Руссонинг соғлиғи ёмонлашгани маълум эди. У сўнгги марта жорий йилнинг 21 сентябрь куни “Бока Хуниорс”нинг “Сентраль Кордова”га қарши ўйини (2:2)да жамоасига ташриф буюрган. Руссо йўқлигида жамоани унинг ёрдамчиси Клаудио Убеда бошқариб келаётганди. Клуб унинг соғлиғи ҳақида расмий маълумот бермаган, бироқ Аргентина ОАВи 2017 йилда мураббийга простата саратони ташхиси қўйилган ҳақида ёзишган эди. 

Мигель Руссо ҳаётининг ярмидан кўпроғини мураббийликка бағишлаган. У “Бока Хуниорс”, “Росарио Сентраль” ва “Эстудиантес де ла Плата” клубларида ишлаган ва бир пайтлар Аргентина миллий терма жамоаси учун менежер сифатида фаолият олиб борган.

Мигель Руссо 2005 йилда “Велес Сарсфилд” билан Аргентина чемпионлигини қўлга киритган. 2007 йилда эса Диего Марадонанинг таклифи билан “Бока Хуниорс”ни бошқариб, Либертадорес кубогида ғалаба қозонган. Бу унинг мураббийлик фаолиятидаги энг катта ютуғи ҳисобланади. Шунингдек, у 2017 йилда “Мильонариос” (Колумбия) жамоасини чемпионликка олиб чиққан. Бу пайтда Руссо саратон касаллигидан кимётерапия курсини эндигина якунлаган эди.

Маълумот учун, Мигел Руссо  жорий йилнинг июнь ойида 4 йиллик танаффусдан сўнг учинчи бор “Бока Хуниорс”ни бошқаришга қайтганди.

Эслатиб ўтамиз, аввалроқ “Бунёдкор” жамоаси мураббийи Сергей Арслонов вафот этганди.