“Бунёдкор” клуби мураббийи вафот этди

Кеча, 22 сентябрь куни “Бунёдкор” клубининг тожикистонлик ёрдамчи мураббийи, собиқ футболчи Сергей Арслонов вафот этди. Бу ҳақда клуб матбуот хизмати хабар берди.

Арслонов футболчилик фаолиятини 1984 йилда Тожикистоннинг “Пахтакор” (ҳозирги “Хатлон”) жамоаси сафида бошлаган ва 8 та ўйин ўтказган. 1986-1987 йилларда у Хабаровскнинг СКА жамоасида 58 та учрашувда майдонга тушиб, битта гол киритган. 

1988 йилдан у Душанбенинг “Помир” жамоасида тўп сурган. Клуб билан биргаликда СССР Биринчи лигасида ғолиб чиқиб, 1989 йилда Премьер-лигада ўйнаган. “Помир” сафида у чемпионат ва кубок баҳсларида жами 14 та ўйин ўтказган.

1990 йилда Краснодарнинг “Кубан” жамоасига ўтиб, 31 лига учрашувида қатнашган. 1991-1992 йилларда у Наманганнинг “Навбаҳор” клуби сафида ўйнаб, 42 та ўйинда 3 та гол урган ва жамоа билан бирга Ўзбекистон Кубогини қўлга киритган. 1993 йилда Россия чемпионатида яна “Кубан” сафида 23 та ўйинда майдонга тушган, сўнгра “Навбаҳор”га қайтиб, икки марта Ўзбекистон чемпионатида бронза медалини қўлга киритган ҳамда 1995 йилда иккинчи бор мамлакат Кубогини ютган.

1996 йилдан Арслонов “Қизилқум” жамоасида фаолиятини давом эттирган. Футболчиликни якунлагач, мураббийлик фаолиятини бошлаган. Мураббий сифатида Арслонов “Қизилқум”, “Динамо Самарқанд” ва Қирғизистоннинг “Дордой” жамоаларида фаолият олиб борган. Сергей Илёсович 2008 йилда Аҳмад Убайдуллаевнинг ёрдамчиси сифатида Ўзбекистон U19 жамоаси билан Осиё кубоги ва ёшлар ўртасидаги 2009 йилги жаҳон чемпионатидаги иштироки билан ном қозонган. Мутахассис сўнгги йилларда “Бунёдкор” клуби мураббийлар штабида фаолият юритаёган эди.