Берлинда супермаркет кассири 11 соат гаровда ушлаб турилди

Германиянинг Берлин шаҳридаги супермаркетлардан бирида содир бўлган гаровга олиш ҳолати полиция амалиёти орқали якунланди. Ҳуқуқ-тартибот идоралари қарийб 11 соат давом этган операция давомида кассир аёлни қутқариб, гумонланувчини қўлга олди. Бу ҳақда “Euronews” хабар берди.

Қайд этилишича, воқеа кеча, 10 июль куни соат 22:00 атрофида бошланган. Гувоҳларнинг айтишича, эркак супермаркетга кириб, кассада ишлаётган аёлни пичоқ билан қўрқитган ва уни гаровга олган.

Гумонланувчи аёлни 11 соат 20 дақиқа давомида ушлаб турган. Шу вақт давомида супермаркет ҳудуди полиция томонидан ўраб олинган. Воқеа жойига махсус кучлар, тез ёрдам ходимлари, ўт ўчирувчилар ҳамда кўплаб полиция экипажлари жалб қилинган.

Полиция музокарачилари гаровга олувчи билан алоқа ўрнатиб, вазиятни тинч йўл билан ҳал қилишга уринган. Бугун, 11 июль куни соат 9:20 атрофида махсус кучлар супермаркет ичига кириб, операцияни якунлаган. Айрим маълумотларга кўра, гумонланувчини қўлга олиш вақтида электрошок қурилмасидан фойдаланилган.

Ҳодиса вақтида супермаркетда бўлган бошқа ходимлар бинодан соғ-саломат чиқарилган ва уларга тез тиббий ёрдам кўрсатилган. Гувоҳлардан бири Германиянинг “Bild” нашрига берган интервьюсида гумонланувчи аввал кассада бўлганини, кейин эса тўсатдан пичоқ чиқарганини айтган. Бироқ полиция ушбу маълумотни ҳозирча расман тасдиқламаган.

Ҳозирда гумонланувчи ва гаровга олинган аёл ўртасида аввалдан алоқа бўлган ёки бўлмаганига аниқлик киритилмаган. Полиция воқеа юзасидан тергов ишларини давом эттирмоқда.

Эслатиб ўтамиз, жорий йилнинг 5 июнь куни Туркиянинг Анқара шаҳрида ота ўзининг 3 ёшли қизини гаровга олиб, даразадан улоқтирмоқчи бўлгани ҳақида хабар берилганди.