Германия парламенти олдида Исроил сиёсатига қарши намойиш ўтказилди

Германия пойтахти Берлинда фаоллар мамлакат парламенти биноси олдидаги байроқ устунига ўрнатилган давлат байроғини Фаластин байроғига алмаштирди. Улар бу орқали ҳукуматнинг Исроилни қўллаб-қувватлаш сиёсати ва Ғазодаги уруш жиноятларига нисбатан сукут сақлаётганини қоралаган. Бу ҳақда “Anadolu” хабар берди.

Мазкур ҳаракат кеча, 8 ноябрь куни “Геноцидга қарши тинчлик йўлида” (Peacefully Against Genocide) гуруҳи фаоллари томонидан амалга оширилган. Гуруҳ вакилларининг билдиришича, акция Фаластин халқи билан ҳамжиҳатлик билдириш, шунингдек, Германия сиёсатчиларининг инсон ҳуқуқларининг жиддий бузилиши ва фаластинликларга қарши геноцидга қарши чора кўрмаётганига норозилик сифатида ташкил этилган.

Гуруҳ аъзоси Аароннинг айтишича, ҳукуматлар Фаластиндаги геноцидга нисбатан сукут сақлаши, унинг содир этилишига йўл қўйиши ёки қўллаб-қувватлаши бутун дунё халқлари номидан иш кўрмаётганини англатади.

“Дунёнинг қайси нуқтасида содир этилишидан қатъи назар, геноцид барчамизга дахл қилади. Биз инсониятга қарши жиноятларни тўхтатиш масъулиятидан қочмаслигимиз керак”, дейди у.

Фаоллар, шунингдек, халқаро ҳуқуқ ва инсон ҳуқуқлари барча учун бирдек амал қилиши кераклигини таъкидлаган.

Берлин полицияси маълумотига кўра, воқеа жойида уч нафар фаол қўлга олинган. Ҳозирда уларга нисбатан давлат ва унинг рамзларини ҳақорат қилиш гумони билан тергов ҳаракатлари бошланган.

“Геноцидга қарши тинчлик йўлида” гуруҳи яқин кунларда Германия ҳукуматининг Исроилга нисбатан сиёсати ва қурол етказиб беришни давом эттираётганига қарши янги намойишлар ўтказишини маълум қилган.

Намойишчилар, хусусан, қурол ишлаб чиқарувчи Rheinmetall компаниясидан Исроилга қурол етказиб беришни тўхтатиш ва Берлиндаги корхонасини ёпишни талаб қилмоқда.

Эслатиб ўтамиз, аввалроқ Германиянинг Франкфурт шаҳрида зумерлар ҳаракати томонидан ташкил этилган намойишлар тартибсизликлар ва дўконларнинг талон-торож қилиниши билан якунлангани ҳақида хабар берилган эди.