Байден Беларусь мухолифати етакчиси Тихановская билан учрашди
Олам
−
29 Июль 2021 4386
АҚШ Президенти Жо Байден кеча, 28 июль куни Беларусь мухолифати етакчиси ва собиқ президентликка номзод Светлана Тихановская билан учрашди. Бу ҳақда Америка раҳбарининг Twitter’да жойлаштирган хабарида айтилган.
“Бугун Тихановская билан Оқ уйда учрашиш мен учун шараф бўлди. Америка Қўшма Штатлари Беларусь халқини демократия ва инсон ҳуқуқлари ғалабасини таъминлаш йўлида қўллаб-қувватлайди”, дейилган баёнотда.
Ушбу хабар чиқарилган пайтда Оқ уйнинг веб-сайтида Байден ва Тихановскаянинг учрашуви тўғрисида расмий маълумотлар бўлмаган ва сиёсатчилар нимани муҳокама қилгани ҳам номаълум.
Тихановскаяга кўра, учрашув 15 дақиқа давом этган. У Президент Байденни Беларусни демократияга зўравонликсиз ўтишнинг муваффақиятли намунаси қилиш учун ёрдам беришга чақирган. Унинг сўзларига кўра, АҚШ Президенти дунёда автократия ва демократия ўртасидаги кураш давом этаётганини таъкидлаган.
“Икки фарзанднинг онаси сифатида умид қиламан-ки, фарзандларим шу пайтгача оналари доимо улар билан бўлмагани учун мени тушунишади ва кечиришади.
Беларусни озодлик сари олиб борадиган йўл қанча вақт ва куч талаб қилмасин, мен уни беларуслар билан бирга босиб ўтишга тайёрман. Бизни бу йўлда қўллаб-қувватлагани учун эса Президент Байденга миннатдорлик билдираман”, деган Тихановская.
Бир кун олдин эса Тихановская АҚШдаги Америка маъмурияти вакиллари билан музокараларда иштирок этган. Учрашув натижасида у Вашингтон Беларусга қарши тармоқ санкцияларини жорий этишига умид билдирган.
“Яқин келажакда Қўшма Штатлар учрашувимизга муносабат билдиради ва тармоқ санкцияларини жорий қилади деб умид қиламан”, деган у.
Эслатиб ўтамиз, Тихановская жорий йилнинг 18 июль куни Қўшма Штатларга келган ва у ерда АҚШ Давлат котиби Энтони Блинкен, АҚШ Президентининг миллий хавфсизлик бўйича маслаҳатчиси Жейк Салливан, Сенат қўмитаси раиси ва АҚШнинг Беларусдаги элчиси Жули Фишер билан учрашган.
Аввалроқ, Тихановская АҚШ Президенти Жо Байден билан учрашмоқчи экани, Байденнинг жадвалида эса ушбу “учрашув” йўқлиги ҳақида хабар бергандик.
Маълумот ўрнида, сўнгги вақтларда Беларусда ички сиёсий мувозанат бузилган. Бунинг илдизи 2020 йилнинг август ойида мамлакатда бўлиб ўтган президентлик сайловларига бориб тақалади. Сайлов натижаларига кўра, 80 фоиз овоз билан Беларусни 1994 йилдан бери бошқариб келаётган Александр Лукашенко ғалаба қилди. Бироқ ушбу натижалар аҳолининг катта қисмида шубҳа уйғотди ва мухолифатнинг чақируви билан мамлакатда намойишлар бошланди.
Бир неча ой давом этган митинг ва маршлар ҳеч қандай фойда келтирмади. Лукашенко ҳокимиятни ўз қўлида сақлаб қолди. Мухолифат ҳамда унинг кўплаб тарафдорлари эса Польша, Литва каби Европа давлатларига қочиб кетди ва у ердан сиёсий бошпана топди.
