Armaniston SHHTga a’zo bo‘lish uchun ariza berdi

Armaniston Shanxay hamkorlik tashkilotiga (SHHT) a’zo bo‘lish uchun ariza berdi. Bu haqda mamlakat Bosh vaziri Nikol Pashinyan kecha, 16 iyul kuni Yerevanda bo‘lib o‘tgan matbuot anjumanida ma’lum qildi.

“Ha, biz SHHTga a’zo bo‘lish uchun ariza berdik. Bu bizning muvozanatni saqlash siyosatimizga to‘g‘ri keladi”, dedi Pashinyan. 

U Armaniston allaqachon SHHT kuzatuvchisi maqomiga ega ekanligini eslatdi.

“Boshqacha qilib aytganda, biz noldan paydo bo‘lib qolganimiz, u yerda ovoz berish huquqiga ega bo‘lmaganimiz va birdan tashkilotga a’zo bo‘lishga qaror qilganimiz yo‘q”, dedi Pashinyan.

Uning ta’kidlashicha, Armaniston rasmiylarining qarori “tashkilotda ro‘y berayotgan muhim va tarkibiy o‘zgarishlar” bilan ham bog‘liq, chunki SHHTda “kuzatuvchi yoki assotsiatsiyalangan a’zo maqomini bekor qilish masalasi” muhokama qilinmoqda.

Nikol Pashinyan Yerevanda bo‘lib o‘tgan matbuot anjumanida o‘z mamlakatining Armanistondan tashqari Rossiya, Belarus, Qozog‘iston, Qirg‘iziston va Tojikistonni o‘z ichiga olgan Kollektiv Xavfsizlik Shartnomasi Tashkilotiga (KXSHT) munosabati haqida ham gapirdi. Pashinyanning so‘zlariga ko‘ra, “Armaniston o‘z ishtirokini muzlatib qo‘ygandan ko‘ra, KXSHTdan chiqishni afzal ko‘radi”. Ma’lumki, Armaniston 2024 yilda KXSHTdagi ishtirokini muzlatib qo‘ygan, 2025 yil martida esa tashkilotni moliyalashtirishni to‘xtatgan.

SHHTga qaytadigan bo‘lsak, avvalroq Armaniston TIV mamlakat SHHTga a’zo bo‘lish istagini bildirganini ma’lum qilgandi.

“Shanxay hamkorlik tashkilotining asosiy tamoyillari, ya’ni hududiy yaxlitlik, kuch ishlatmaslik va chegaralar daxlsizligi bilan o‘rtoqlashgan holda, Armaniston Respublikasi SHHTga a’zo bo‘lish istagini bildirdi”, deyiladi vazirlik bayonotida.

Armaniston 2024 yil iyul oyida assotsiatsiyada to‘liq ishtirok etishdan oldin SHHT kuzatuvchisi davlat maqomini so‘ragan. Ozarbayjon ham kuzatuvchi bo‘lish istagini bildirgan va Turkiya Prezidenti Rajab Toyib Erdo‘g‘an uning davlati SHHTga doimiy a’zo sifatida qo‘shilishi kerakligini aytgan. Oradan bir yil o‘tib, Pekinda xitoylik mavqedoshi bilan bo‘lib o‘tgan uchrashuvdan so‘ng Armaniston Tashqi ishlar vaziri Ararat Mirzoyan Yerevanning SHHTning doimiy a’zosi bo‘lish istagini oshkora e’lon qildi.

Ma’lumot uchun, Shanxay Hamkorlik Tashkiloti o‘nta davlatdan iborat xalqaro birlashma bo‘lib, umumiy aholisi taxminan 3,5 milliard kishini tashkil etadi. Bular Rossiya, Hindiston, Eron, Qozog‘iston, Xitoy, Qirg‘iziston, Pokiston, Tojikiston, O‘zbekiston va Belarusdir. U 2001 yil 15 iyunda tashkil etilgan. Tashkilotdagi rasmiy tillar rus va xitoy tillaridir.