Анқара Ғазода сулҳга риоя этилишини диққат билан кузатади – Эрдўған

north_east

Ғазо тинчлик режасини кўз ёшлар билан қаршилади (фото, видео)

Туркия Президенти Ражаб Тойиб Эрдўған ҲАМАС ҳаракати ва Исроил ўртасида Ғазо секторида ўт очишни тўхтатиш бўйича эришилган келишувни мамнуният қабул қилганини айтди ва ушбу сулҳ шартларига қатъий риоя этилишини диққат билан кузатишини билдирди. Бу ҳақда Эрдўған девони томонидан эълон қилинган расмий мурожаатда сўз боради.

“Туркия ўз ҳиссасини қўшган Шарм ал-Шайхдаги ҲАМАС ва Исроил музокараларининг муваффақиятли якунланганини чин дилдан олқишлайман ва Ғазо секторида ўт очишни тўхтатиш бўйича сулҳга эришилганига катта мамнуният изҳор этаман”, дейди Туркия етакчиси.

Эрдўған Анқара ушбу сулҳ шартларига қатъий риоя этилишини диққат билан кузатишда ва бу жараёнга ўз ҳиссасини қўшишда давом этишини маълум қилган.

“Исроил ҳукуматини ўт очишни тўхтатишга ундовчи сиёсий иродани намоён этган АҚШ Президенти Доналд Трампга, шунингдек, Қатарга ва Мисрга алоҳида миннатдорлик билдираман”, дейди Эрдўған.

Қайд этиш жоиз, бунгача АҚШ Президенти Дональд Трамп Исроил ва Фаластиннинг ҲАМАС ҳаракати Ғазо секторида ўт очишни тўхтатиш режасининг биринчи босқичи бўйича келишувга эришганини маълум қилган эди.

Келишувга кўра, асирлар энг қисқа муддатда озод этилади, Исроил қуролли кучлари эса олдиндан белгиланган чизиққача орқага чекинади.

“Мен катта фахр билан шуни маълум қиламанки, Исроил ва ҲАМАС тинчлик режамизнинг биринчи босқичини маъқуллади”, дейди Трамп.

Эслатиб ўтамиз, аввалроқ Қозоғистон Президенти Қосим-Жомарт Тўқаев Исроил ва ҲАМАС ўртасида тинчлик режасининг биринчи босқичи имзоланганига муносабат билдириб, Ғазо секторида ўт очишни тўхтатиш ва гаровдагиларни озод этиш бўйича эришилган келишувни қўллаб-қувватлагани ҳақида хабар берилган эди.