Анчелоттининг ўғли “Лилль”га бош мураббий бўлди

Бразилия терма жамоасининг бош мураббийи Карло Анчелоттининг ўғли Давиде Анчелотти Франциянинг “Лилль” клубининг бош мураббийи этиб тайинланди. Бу ҳақда француз клуби матбуот хизмати хабар берди. 

36 ёшли италиялик мутахассис ўз фаолияти давомида бир қатор клублар ва миллий терма жамоаларда ишлаган. У “Лилль” билан икки йиллик шартнома имзолади.

“Мен жуда фахрланаман ва бахтлиман. Президент Оливье Летангга менга билдирган ишончи ва тақдим этган имконияти учун миннатдорчилик билдираман. Биз батафсил суҳбатлашдик ва ўзаро яқинликни ҳис қилдим, фикрларимиз ҳамда қадриятларимиз мос келди. “Лилль” мен учун жуда мос клуб. Унинг аниқ ўзига хослиги, юқори талаблари ва кучли меҳнат маданияти бор. Бу жиддий, катта мақсадларга эга ва рақобатбардош клуб бўлиб, мунтазам равишда Европа мусобақаларида иштирок этади. Бугун “Лилль” манфаатларини ҳимоя қилиш мен учун катта шараф”, деди Анчелотти клуб расмий сайтига берган интервьюсида.

2025–2026 йилги мавсум якунларига кўра, “Лилль” Франция Лига 1 да учинчи ўринни эгаллади. Натижада жамоа 2026–2027 йилги UEFA Чемпионлар лигасининг асосий босқичида иштирок этиш ҳуқуқини қўлга киритди.