АҚШ “қизил” давлатлар рўйхатини тузмоқда

АҚШ маъмурияти мамлакат Президенти Дональд Трампнинг кеча, 6 март куни имзолаган фармонига мувофиқ баъзи давлатлар фуқароларининг АҚШга киришини чеклашни режалаштирмоқда ва улар “қизил” рўйхатга киритилади. Бу ҳақда “The New York Times” хабар берди.

Нашрнинг ёзишича, ушбу чекловлар қуйидаги давлатларга тааллуқли – Куба, Эрон, Ливия, Шимолий Корея, Сомали, Судан, Сурия, Венесуэла ва Яман. Шунингдек, Афғонистон ҳам ушбу рўйхатга киритилиши мумкин.

Мазкур давлатлар “қизил” рўйхатга киритилиб, уларнинг фуқароларига АҚШга кириш тўлиқ тақиқланади. Бундан ташқари, “сариқ” рўйхатдаги давлатларга ўзларининг паспорт бериш қоидалари ва саёҳатчилар ҳақидаги маълумотларни тақдим этиш каби АҚШ талабларини бажариш учун 60 кунлик муддат берилади. Агар бу талаблар бажарилмаса, ушбу давлатлар ҳам “қизил“ ёки “тўқ сариқ” тоифага ўтказилиши мумкин.

Маълумот учун, Трамп 2017 йил илк президентлик даврида “Миллатни чет эл террорчиларининг АҚШга киришидан ҳимоя қилиш” номли фармонни имзолаган эди. Бу фармон баъзи мусулмон давлатлари фуқароларининг АҚШга киришини вақтинча тўхтатган эди.

Шунингдек, АҚШ Давлат департаменти томонидан “терроризмга ҳомий давлатлар” рўйхати юритилади. Жорий йил бошига кўра, ушбу рўйхатда Сурия, Куба, Эрон ва Шимолий Корея мавжуд.

Эслатиб ўтамиз, Трамп иккинчи муддатга сайланиб, жорий йил январь ойида инауграци қилган куниёқ ноқонуний мигрантларга қарши кураштшни назарда тутувчи фармон имзолади. Шундан сўнг, бир қанча мамлакат фуқаролари, жумладан, ўзбекистонликлар АҚШдан депортация қилинди.