Абдужаббор Абдувоҳидовга янги ўринбосар тайинланди

Абдурашид Жўрабоев Ўзбекистон Республикаси Президентининг ёшлар, фан, таълим, соғлиқни сақлаш, маданият ва спорт масалалари бўйича маслаҳатчисининг ўринбосари лавозимига тайинланди. Президент Шавкат Мирзиёевнинг тегишли фармони имзолангани ҳақида хабарлар тарқалди.

Аммо ҳозирча Абдурашид Жўрабоевнинг Президент маслаҳатчисига ўринбосар бўлгани ҳақида расман эълон қилинмади.

Маълумот ўрнида, Абдурашид Абдувоҳидович Жўрабоев бунгача Вазирлар Маҳкамасининг Ёшлар сиёсати, маданият, маънавият, оммавий ахборот воситалари, ижодий ва жамоат ташкилотлари масалалари котибияти  мудири лавозимида ишлаб келаётган эди. У муқаддам Олий Мажлис Қонунчилик палатасининг Ахборот ва коммуникация технологиялари масалалари қўмитаси раиси лавозимида ҳам фаолият кўрсатган.

Эндиликда у президентнинг ёшлар, фан, таълим, соғлиқни сақлаш ва спорт масалалари бўйича маслаҳатчиси Абдужаббор Абдусатторович Абдувоҳидовга ўринбосарлик қилади. Бу лавозимда ундан аввал Давлат хизмати ва давлат ҳокимияти органлари билан ҳамкорлик қилиш масалалари бўйича президент маслаҳатчиси Шерзод Қудбиевга биринчи ўринбосар этиб тайинланган Қаҳрамон Қуронбоев фаолият юритган.

Эслатиб ўтамиз, аввалроқ Президент маслаҳатчиси ўринбосари Фарҳод Маҳмудов Президент администрацияси раҳбари Зайнилобиддин Низомиддиновга ўринбосар этиб тайинлангани хабар қилинганди.