Abdujabbor Abduvohidovga yangi o‘rinbosar tayinlandi

Abdurashid Jo‘raboyev O‘zbekiston Respublikasi Prezidentining yoshlar, fan, ta’lim, sog‘liqni saqlash, madaniyat va sport masalalari bo‘yicha maslahatchisining o‘rinbosari lavozimiga tayinlandi. Prezident Shavkat Mirziyoyevning tegishli farmoni imzolangani haqida xabarlar tarqaldi.

Ammo hozircha Abdurashid Jo‘raboyevning Prezident maslahatchisiga o‘rinbosar bo‘lgani haqida rasman e’lon qilinmadi.

Ma’lumot o‘rnida, Abdurashid Abduvohidovich Jo‘raboyev bungacha Vazirlar Mahkamasining Yoshlar siyosati, madaniyat, ma’naviyat, ommaviy axborot vositalari, ijodiy va jamoat tashkilotlari masalalari kotibiyati  mudiri lavozimida ishlab kelayotgan edi. U muqaddam Oliy Majlis Qonunchilik palatasining Axborot va kommunikatsiya texnologiyalari masalalari qo‘mitasi raisi lavozimida ham faoliyat ko‘rsatgan.

Endilikda u prezidentning yoshlar, fan, ta’lim, sog‘liqni saqlash va sport masalalari bo‘yicha maslahatchisi Abdujabbor Abdusattorovich Abduvohidovga o‘rinbosarlik qiladi. Bu lavozimda undan avval Davlat xizmati va davlat hokimiyati organlari bilan hamkorlik qilish masalalari bo‘yicha prezident maslahatchisi Sherzod Qudbiyevga birinchi o‘rinbosar etib tayinlangan Qahramon Quronboyev faoliyat yuritgan.

Eslatib o‘tamiz, avvalroq Prezident maslahatchisi o‘rinbosari Farhod Mahmudov Prezident administratsiyasi rahbari Zaynilobiddin Nizomiddinovga o‘rinbosar etib tayinlangani xabar qilingandi.