ССВ фуқароларни ҳушёрлика чақирди

Сўнгги кунларда Навоий ва Самарқанд вилоятида аҳоли ўртасида коронавирусга чалиниш ҳолатлари аниқланмоқда. Шу сабаб, бугун, 22 май куни Соғлиқни сақлаш вазирлиги аҳолини ҳушёрликка чақириб, баёнот билан чиқди.

“Ҳамон юртимизда коронавирусни юқтирганлар аниқланмоқда. Жумладан, бугун кун давомида коронавирус инфекцияси аниқланганлар 61 нафарни ташкил қилмоқда. Хавотирли жиҳати, улардан 39 нафари аҳоли орасида қайд этилган бўлса, улардан 24 нафари Самарқанд, 15 нафари эса Навоий вилоятларига тўғри келмоқда. Ҳозирда ушбу беморлар билан мулоқотда бўлган барча фуқаролар белгиланган тартибда қатъий карантинга олинган“, дейилади вазирлик баёнотида.

Маълум қилинишича, айни пайтда Навоий вилоятида 66 нафар коронавирусга чалинган беморлар қайд этилиб, уларнинг барчаси ушбу ҳудудда касалликка чалинган, уларнинг орасида хориждан келганлар йўқ. Шундан 2 нафари соғайган бўлса, қолган 64 нафари даволанмоқда. Навоий вилояти бор йўғи 3 фоиз соғайиш кўрсаткичи билан касалликдан даволаниш бўйича мамлакатимизда энг сўнгги ўринда бормоқда. Ваҳоланки, мамлакатда соғайиш кўрсаткичи 81 фоиздан ошган.

Карантин қоидаларига қатъий риоя этилмаганлиги оқибатида вилоятда сўнгги икки ҳафтада касалликка чалинганлар сони кескин ошди. Мисол учун, 20 май куни 17 нафар, 21 май куни 5 нафар қайд этилган бўлса, бугун соат 10.00 ҳолатига яна 15 нафар фуқарода касаллик тасдиқланиб, вилоятда сўнгги уч кунда вирус юқтирганлар 37 нафарга кўпайди. Касаллик тарқалишининг асосий ўчоғи Зарафшон шаҳри бўлиб турибди.

Шундан келиб чиққан ҳолда, Навоий вилояти, шунингдек, бошқа коронавирус инфекциясига чалинганлар аниқланаётган бошқа ҳудудларда карантин қоидаларини кучайтириш, Миллий гвардия, Мудофаа ва Ички ишлар вазирлиги ходимлари ҳамда маҳаллий ҳокимлик вакиллари билан биргаликда коронавирус инфекцияси тарқалишининг олдини олиш, беморларни самарали даволаш ҳамда карантиндаги фуқароларни тиббий кузатувга олишни янада самарали йўлга қўйиш борасида изчил фаолият олиб борилмоқда.

“Айни ҳолатда нафақат Навоий ёки Самарқанд вилоятлари, балки юртимизнинг барча ҳудудларидаги аҳоли ҳам ҳушёр бўлишлари, бундан тўғри хулоса чиқаришлари талаб этилади.

Соғлиқни сақлаш вазирлиги, яна бир бор, карантин қоидаларига, жумладан, ижтимоий масофани сақлаш, жамоат жойларида тўпланмаслик, қўлларингизни тез-тез ва яхшилаб ювиш, қўлни кўкракка қўйиб саломлашиш, тиббий ниқоб тақишда давом этиш каби қоидаларга қатъий амалга қилишларингизни сўрайди.

Шунингдек, муборак Рамазон ҳайити байрами арафасидамиз. Ушбу муқаддас кунда гуруҳ-гуруҳ бўлиб, хонадонма-хонадон юришларни чеклаш, турли маросимларни ўтказмасликни қатъий сўраб қолади. Чунки атрофимизда касалликка чалинганлар йўқлигига ҳеч ким кафолат бера олмайди. Демак, сиз ҳам касалликка чалинишингиз, уйга келиб, оила аъзоларингизга юқтиришингиз эҳтимоли катталигини асло унутманг. Бу эса жуда жиддий оқибатларга сабаб бўлиши мумкин.

Коронавирус юқтириб олишнинг эҳтимолий хавфидан ўзингизни ва яқинларингизни эҳтиёт қилинг“, дейилади вазирлик баёнотида.

Эслатиб ўтамиз, Ўзбекистонда коронавирусни юқтириб олиш билан боғлиқ илк ҳолат жорий йилнинг 15 март куни қайд этилган эди. Айни вақтгача 3006 кишида коронавирус аниқланди. Касалланганларнинг 2492 нафари соғайган. Бугунгача беморларнинг 13 нафари вафот этган.