Ҳиндистондаги даҳшатли авиаҳалокатда 1 киши омон қолди (видео)

north_east

Ҳиндистондаги даҳшатли авиаҳалокат: самолёт ётоқхона устига қулаган (фоторепортаж)

Буюк Британия фуқароси бўлган 40 ёшли Вишвакумар Рамеш Air India’нинг AI171 рейси ҳалокатидан омон қолган ягона одам бўлди. У Лондонга учаётган самолётда 11А ўриндиғида, яъни фавқулодда чиқиш ёнида, ойнанинг ёнида ўтирган. У бу ҳақда DD News журналистларига берган интервьюсида маълум қилди.

“Хавфсизлик камарини ечишга муваффақ бўлганимда, дераза яқинидаги эшикни оёғим билан тепиб очдим ва ташқарига судралиб чиқдим”, дейди у.

Авиакомпания маълумотларига кўра, бортда қолган 241 кишининг барчаси – 229 йўловчи ва 12 экипаж аъзоси эса ҳалок бўлган. Қурбонларнинг аксарияти Ҳиндистон (169 киши) ва Британия (52 киши) фуқаролари бўлган. Улардан фақатгина айнан Рамеш мўъжизавий тарзда омон қолган.

У ўтирган самолёт ҳавога кўтарилганидан кўп ўтмай, Аҳмадободдаги тиббиёт ходимлари ва талабалари яшайдиган ётоқхонага қулаган. Ҳозиргача 200 дан ортиқ жасад топилган, аммо уларнинг қайси бири йўловчи, қайси бири ерда бўлган қурбон экани аниқ эмас.

Рамешнинг сўзларига кўра, кўтарилишдан бир неча лаҳза ўтиб, салонда чироқлар титрай бошлаган.

“Самолёт гўёки ҳавода “осилиб” қолгандай бўлди. Чироқлар яшил ва оқ рангда ялтирарди… Сўнг самолёт бинога урилди ва портлади”, дейди у.

Рамеш ўтирган жой самолётнинг қулаган қисмида бўлган, бинога тегмаган, шу сабабли омон қолишга имкон бўлган.

“Дераза эшиги отилиб кетганида ташқарида бўш жой борлигини кўрдим. У ердан ўта олдим”, дейди у.

Самолёт иккинчи томони билан пастга қулаган бўлгани боис, қарама-қарши томонда ўтирган йўловчилар учун қочиш имкони бўлмаган.

Ҳалокат сабаблари ҳозирча номаълум. Фақатгина “қора қути” топилгани ва у орқали текширув давом эттирилиши маълум.

Ижтимоий тармоқларда тарқалган видеода, Рамеш ўз оёғи билан тез ёрдам машинасига яқинлашаётгани, орқасида эса тутун кўтарилаётгани кўринади.

“Ёнимдаги икки йўловчи ва стюардессалар кўз ўнгимда ҳалок бўлди. Ўша пайтда мен ҳам ўляпман деб ўйладим. Аммо кўзимни очганимда, тирик эканимни тушундим. Ҳалигача тирик қолганимга ишонолмайман. Мен вайроналар остидан тирик чиқдим”, дея воқеани хотирлайди у.

Рамешнинг шифокори Дҳавал Гамети унинг танасида кўплаб жароҳатлар борлигини, бироқ ҳаётига хавф йўқлигини маълум қилган.

Маълумот учун, Вишвакумар Рамеш Ҳиндистонда туғилган, лекин 2003 йилда Британияга кўчиб ўтган. У билан бирга укаси Ажай ҳам учган ва ҳодиса оқибатида ҳалок бўлган. Уларнинг амакиваччаси Ҳирен Кантилалга кўра, улар Ҳиндистонга бир неча ойлик таътилга келган.

Air India’га тегишли Tata Group компанияси ҳодисани ўрганиш учун Буюк Британия ва АҚШдан мутахассислар келганини эълон қилди.

Камида саккиз киши самолёт қулаган бинода – ётоқхонада ҳалок бўлгани аниқланган. Уларнинг тўрттаси тиббиёт талабаси, тўрттаси эса ходимларнинг яқинлари бўлган. Ҳиндистон Бош вазири Нарендра Моди ҳалокат жойига ва шифохонага ташриф буюрган.

Полиция маълумотига кўра, фақат 6 та жасад таниб олинган. Кўпчилик жасадлар таниб бўлмас ҳолатда бўлгани сабаб, ДНК таҳлили орқали аниқлаш ишлари давом этмоқда.

Эслатиб ўтамиз, ушбу авиаҳалокат жорий йилнинг 12 июнь куни Ҳиндистоннинг Гужарат штати Аҳмадобод шаҳрида содир бўлган эди. Дастлаб ҳодиса оқибатида самолёт бортида бўлган барча 242 киши, шунингдек, учоқ қулаган талабалар ётоқхонасидаги 35 киши – жами 317 нафар одам ҳалок бўлгани айтилди. Кейинроқ ушбу рейсда учган бир кишининг омон қолгани маълум бўлди.