Ҳиндистон Россия нефтидан бутунлай воз кечдими?

Кремль АҚШ Президенти Дональд Трампнинг Ҳиндистон билан савдо битими тўғрисидаги баёнотларини диққат билан кузатиб бормоқда. Бироқ, ҳозирча Нью-Деҳли Россия нефтини сотиб олишдан бош тортгани ҳақида ҳеч қандай расмий изоҳ бермаган. Бу ҳақда Россия Президентининг матбуот котиби Дмитрий Песков “Ведомости” нашрига берган интервьюсида маълум қилди. 

Песковнинг айтишича, Москва АҚШ Президенти баёнотларига жиддий эътибор қаратмоқда ва уларни таҳлил қилиб бормоқда. Шу билан бирга, Россия АҚШ ва Ҳиндистон ўртасидаги муносабатларни ҳурмат қилишини, аммо Нью-Деҳли билан ўзининг стратегик шериклигига ҳам катта аҳамият беришини таъкидлади.

“Биз Ҳиндистон билан стратегик шерикликни ривожлантиришни муҳим деб ҳисоблаймиз. Шу сабабдан икки томонлама муносабатларни тинч йўл билан давом эттириш устувор вазифа бўлиб қолади”, дейди Кремль вакили.

Қайд этиш жоиз, кеча, 2 февраль куни Дональд Трамп ва Ҳиндистон Бош вазири Нарендра Моди ўртасидаги музокаралардан сўнг Нью-Деҳли АҚШ ва Венесуэладан нефть харид қилишга рози бўлгани ҳақида хабарлар тарқалди. Трампнинг айтишича, бунинг эвазига АҚШ Ҳиндистонга нисбатан бож тарифларини 25 фоиздан 18 фоизгача пасайтиришга рози бўлган.

Шу билан бирга, Нарендра Моди Россия нефтини сотиб олишдан воз кечганини расман тасдиқламаган.

Эслатиб ўтамиз, аввалроқ Дональд Трамп Ҳиндистон Россиядан нефть сотиб олишни тўхтатишга ва АҚШдан кўпроқ нефть харид қилишга рози бўлганини маълум қилганди.

Жамшидбек Амиров