Ангренда ота ўз фарзандини калтакладими? (видео)

Кеча, 27 май куни ижтимоий тармоқларда ҳайит байрамида ота ўз фарзандини уриб, майиб қилгани айтилган видео тарқалди. Мазкур ҳолат юзасидан Тошкент вилояти Ички ишлар бош бошқармаси матбуот котиби Бобур Тўлаганов муносабат билдирди.

Маълум қилинишича, ушбу ҳолат Ангрен шаҳрида содир бўлган. Ота икки нафар фарзандини байрам муносабати билан хиёбонга олиб борган. Улар ҳиёбондан айланиб қайтаётган вақтида катта фарзанди автомобиль йўлига югуриб чиқишга урунган. Отаси уни ушлаб қолиш учун қўл узатган. Шу вақтда отасининг қўли ўғлининг бурун қисмига тегиб кетиб, ўғлининг бурни қонаб кетган.

Шундан сўнг, фарзандига катта йўлга чиқмасликни уқтираётган отанинг ҳолати атрофдагилар томонидан нотўғри талқин қилиниб, ижтимоий тармоқларга тарқатилган. Ўрганиш давомида вояга етмаган боланинг онаси ҳам кўрсатма бериб, турмуш ўртоғи томонидан муқаддам фарзандларини уриш, тазйиқ ўтказиш ҳолатлари содир бўлмаганлигини маълум қилган.

Билдирилишича, интернет орқали тарқатилган талқинлар ҳақиқатга тўғри келмайди.

Эслатиб ўтамиз, аввалроқ Тошкент вилоятининг Паркент туманида онасини турли сўзлар билан ҳақоратлаб, уни ўлдириш билан таҳдид қилган 37 ёшли аёл 5 суткага қамалган эди.