ИИО ходими билан “қувлашмачоқ ўйнаган” эркак BYD’га урилди

Тошкент шаҳрида қидирувда бўлган шахс ички ишлар ходимларидан қочишга уриниб, йўлда кетаётган BYD автомобилига урилди. Бу ҳақда Тошкент шаҳар Ички ишлар бош бошқармаси хабар берди.

Қайд этилишича, жорий йилнинг 19 октябрь куни хизмат вазифасини бажараётган ички ишлар ходимларига Тошкент шаҳар ИИББ Тезкор бошқарув марказидан қидирувдаги шахс “Малика” бозори ҳудудида эканлиги ҳақида хабар келиб тушган.

Ходимлар шахсни аниқлаб, планшет орқали текширган ва уни ушлаш чораларини кўрган. Қочишга уринган фуқаро йўлда BYD автомобилига урилганига қарамай, ҳаракатланишда давом этган. Ходимлар уни тезкорлик билан қўлга олиб, дастлаб бозор ҳудудидаги ички ишлар таянч пунктига, кейин эса тегишли ички ишлар органларига олиб борган.

Воқеа гувоҳларидан бирининг айтишича, қочаётган шахс дўкондан югуриб чиқиб, BYD автомобилига урилган. Шундан сўнг, ички ишлар ходимлари уни тезкорлик билан ушлаган.

Маълум қилинишича, фуқаро бир неча марта тергов жараёнларига чақирилган, бироқ бормаган. Шу сабабли унга нисбатан қидирув эълон қилиниб, мажбурий келтириш белгиланган. Қўлга олинган шахс ҳам терговга чақирилганида бормагани сабабли қидирувга берилганини тасдиқлаган. У қилган ишидан пушаймонлигини билдириб, қонун олдида жавоб беришга тайёрлигини айтган.

Билдирилишича, ҳозирда фуқарога нисбатан текширув ҳаракатлари олиб борилмоқда.

Эслатиб ўтамиз, аввалроқ Самарқанд вилоятининг Иштихон туманида ижарага олинган Malibu-2 автомобилида ҳаракатланган техникум ўқувчилари йўл-патруль хихмати ходимининг тўхташ талабига бўйсунмай, уни ҳақорат қилгани ҳақида хабар берилган эди.