Ҳаррис сиёсий майдонга қайтиб, Трампни кескин танқид қилди

Кеча, 30 апрель куни АҚШнинг собиқ вице-президенти Камала Ҳаррис Сан-Францискодаги демократлар аудиторияси олдида нутқ сўзлаб, Дональд Трампнинг президентликдаги илк 100 кунини танқид остига олди ва бу даврни “Американинг энг олий қадриятларидан оммавий воз кечиши” даври деб атади. Мазкур баёнот Ҳарриснинг лавозимдан кетганидан буён қилган энг муҳим сиёсий чиқиши бўлди. Бу ҳақда “The Guardian” хабар берди.

Ҳаррис ўз нутқида Трампнинг кескин сиёсий дастурига қарши чиқаётган раҳбарлар ва институтларни олқишлаган. Улар жасорат билан ҳаракат қилаётган Конгресс аъзолари, қонун устуворлигини ҳимоя қилаётган судьялар, Трамп маъмуриятининг конституцияга зид талаблари билан курашаётган университетлар ҳамда ижтимоий таъминотни ҳимоя қилиш учун сафарбар бўлаётган оддий америкаликлар.

“Бу чиқиш Ҳарриснинг Трамп иккинчи муддатга қайтганидан бери энг кучли сиёсий қайтиши бўлди. У ҳозирда Лос-Анжелесда яшайди ва сиёсий фаолиятининг навбатдаги босқичи – 2026 йилда Калифорния губернаторлигига номзодлик ёки 2028 йилда президентлик учун яна курашга қўшилиш устида ўйламоқда”, дейилади хабарда.

У Трампни қўрқув ва бетартибликни атайлаб уйғотиб, шахсий ҳокимиятини мустаҳкамлашда айблаган.

“Улар айрим одамларни қўрқитиш орқали бошқаларга ҳам совуқ таъсир ўтказа оламиз, деб ўйлашмоқда. Аммо улар унутиб қўйган нарса бор: фақат қўрқув эмас, жасорат ҳам юқумли”, деди Ҳаррис.

У америкаликларни бирлашишга, сиёсатга киришга, асосий ҳуқуқ ва қадриятлар учун курашишга чақирган.

“Келинг, мана шуни мустаҳкамлайлик”, деди у.

Ҳаррис бу нутқни Emerge America ташкилотининг Сан-Францискодаги Palace Hotel меҳмонхонасида бўлиб ўтган 20 йиллик юбилей тадбирида айтган. Ташкилот айнан Ҳаррис 2003 йилда Сан-Франциско прокурорлигига номзод бўлганидан кейин демократ аёлларни сиёсий лавозимларга тайёрлаш учун тузилган. Ҳаррис бу ташкилотни эътироф этиб, ундаги аёлларнинг кучли лидерлик салоҳиятини юқори баҳолаган.

Тадбирда Калифорния вице-губернатори Элени Коуналакис ва Конгресснинг собиқ аъзоси Кети Портер ҳам иштирок этган. Уларнинг иккаласи ҳам губернаторликка даъвогарлик қилмоқчи.

Ҳаррис ўз чиқишида Трампнинг иккинчи муддатининг тартибсиз бошланиши тасодифий эмас, балки “Project 2025” деб номланган консерватив сиёсий режа асосида амалга оширилаётганини айтган.

“Бу шунчаки бетартиблик эмас. Бу ўн йилликлар давомида тайёрланган дастур жуда тез ва қатъий жорий этилаётганининг натижаси”, деди у.

У Трампнинг федерал ҳукуматни қисқартириш ҳаракатлари, ирқий ва гендер тенглик сиёсатига қарши юритаётган курашини танқид қилган.

“Трампнинг бузғунчи тарифлари мамлакатни очиқдан-очиқ инқирозга етакламоқда. Айнан шундай бўлишини башорат қилган эдим”, деди у бу борада илгари сайлов кампаниясида берган огоҳлантиришларига ишора қилиб.

Маълум бўлишича, бир кун аввал Трамп маъмурияти Ҳарриснинг турмуш ўртоғи Дуг Эмхоффни ва бошқа Байден давридаги юқори мартабали амалдорларни АҚШ Холокост Мемориал музейи бошқарув кенгашидан ҳайдаган. Эмхофф бу қарорга қарши бўлган ва Оқ уй билан бўлган можарода ҳам фаол қатнашган. Ҳаррис бу воқеани бевосита тилга олмаган бўлса-да, “конституцияга зид таҳдидларга бўйсунаётганлар” ҳақида айтган гапи билан бунга ишора қилган.

Калифорния каби йирик демократ штатни бошқариш Ҳаррисга Трампга қарши либерал қадриятлар асосида курашиш учун кучли минбар бўлиши мумкин. Калифорния собиқ бош прокурори ва сенатор сифатида Ҳаррис ёз охиригача бу борада қарор қабул қилиши кутилмоқда.

Эслатиб ўтамиз, 15 апрель куни АҚШ собиқ президенти Жо Байден лавозимини тарк этганидан бери илк бор омма олдида нутқ сўзлаб, амалдаги Президент Дональд Трампни кескин танқид қилганди.