ҲАМАС гаровдаги 3 исроилликни озод қилди (видео)

Бугун, 1 февраль куни Фаластиннинг ҲАМАС ҳаракати уч исроиллик гаровга олинган фуқарони Халқаро Қизил Хоч қўмитасига топширди. Бу ҳақда Исроил мудофаа кучлари маълум қилди. 

“Қизил Хочдан олинган маълумотларга кўра, 3 нафар гаровга олинган исроилликлар ташкилотга топширилган”, дейилади хабарда. 

Қайд этилишича, айирбошлаш турли хил жойда амалга оширилади. Озод қилинганлар 35 ёшли Исроил фуқароси Ярден Бибас, Франция ва Исроил фуқароси Офер Кальдерон ҳамда Америка-Исроил фуқаролигига эга 65 ёшли Кит Сигелдир. 

Шунингдек, Исроил ҳам бугун, 1 февраль куни Ғазо секторида ўт очишни тўхтатиш келишувининг биринчи босқичи доирасида 90 нафар фаластинлик маҳбусни, жумладан, тўққиз нафар умрбод қамоқ жазосига ҳукм қилинганларни озод қилиши керак. 

Маълумот учун, Исроил, Фаластиннинг ҲАМАС ҳаракати, АҚШ ва Қатар вакиллари 16 январь куни кечқурун Доҳада Ғазо секторида гаровга олинганларни озод қилиш ва ўт очишни тўхтатиш бўйича келишувни расман имзолади. 19 январь куни кечқурун ҲАМАС биринчи асирлар гуруҳини озод қилди. Улар уч нафар шахсдан иборат бўлган. Исроил эса 90 фаластинлик маҳбусни озод қилган. 25 январь куни сулҳ келишувининг биринчи босқичи доирасида асир алмашишнинг иккинчи раундида Ғазо секторида сақланаётган тўрт нафар исроиллик аёл эвазига Исроил қамоқхоналарида сақланаётган 200 нафар фаластинлик озод қилинди.

Эслатиб ўтамиз, 30 январь куни Исроил ҳукумати гаровга олинган фаластинлик маҳбусларни озод қилишни қисқа муддатга кечиктирганди. Дастлаб, исроиллик гаровга олинганлар хавфсиз чиқиб кетиши кафолатланмагунча, фаластинлик маҳбуслар озод қилинмаслиги айтилди. Аммо, бироз вақт ўтгач, ҲАМАС ҳаракати гаровга олинган уч нафар исроиллик ва беш нафар Таиланд фуқаросини Ғазодаги Халқаро Қизил Хоч қўмитасига топширганди. Шундан сўнг, Ғазо секторида ўт очишни тўхтатиш келишуви доирасида Исроил қамоқхоналаридан 110 нафар фаластинлик маҳбус озод этилди.