Исроил 110 фаластинлик асирни озод қилди

Кеча, 30 январь куни Ғазо секторида ўт очишни тўхтатиш келишуви доирасида Исроил қамоқхоналаридан 110 нафар фаластинлик маҳбус озод этилди. Бу ҳақда Исроил расмийларига таяниб, “Euro News” хабар берди.

Маълум қилинишича, айирбошлаш битимининг учинчи қисми 110 маҳбусни озод қилишни ўз ичига олган. 

“Биз 110 фаластинликдан иборат учинчи маҳбуслар гуруҳи озод қилинганини мамнуният билан эълон қиламиз. Унга умрбод қамоқ жазосига ҳукм қилинган 32 нафар, узоқ муддатга озодликдан маҳрум этилган 48 нафар ва 30 нафар вояга етмаганлар киради”, дейилади хабарда. 

Маълумот учун, Исроил, Фаластиннинг ҲАМАС ҳаракати, АҚШ ва Қатар вакиллари 16 январь куни кечқурун Доҳада Ғазо секторида гаровга олинганларни озод қилиш ва ўт очишни тўхтатиш бўйича келишувни расман имзолаганди. 19 январь куни кечқурун ҲАМАС биринчи асирлар гуруҳини озод қилди. Улар уч нафар шахсдан иборат бўлган. Исроил эса 90 фаластинлик маҳбусни озод қилган. 25 январь куни сулҳ келишувининг биринчи босқичи доирасида асир алмашишнинг иккинчи раундида Ғазо секторида сақланаётган тўрт нафар исроиллик аёл эвазига Исроил қамоқхоналарида сақланаётган 200 нафар фаластинлик озод қилинди.

Эслатиб ўтамиз, 30 январь куни Исроил ҳукумати гаровга олинган фаластинлик маҳбусларни озод қилишни қисқа муддатга кечиктирганди. Дастлаб, қарорда исроиллик гаровга олинганлар хавфсиз чиқиб кетиши кафолатланмагунча, фаластинлик маҳбуслар озод қилинмаслиги белгиланганди. Аммо бироз вақт ўтгач, ҲАМАС ҳаракати гаровга олинган уч нафар исроиллик ва беш нафар Таиланд фуқаросини Ғазодаги Халқаро Қизил Хоч қўмитасига топширганди. Шундан сўнг, Исроилнинг бир қатор ОАВлари Исроил қамоқхоналаридан озод этилиши керак бўлган фаластинлик маҳбуслар соат 18:00 да озод қилиниши ҳақида маълум қилди.