“Мени шу ерда ўлдиринг”. Собиқ президентнинг оиласи уйидан ҳайдаб чиқарилди

Қирғизистон собиқ президенти Алмазбек Атамбоев оила аъзолари Атамбоевлар оиласига тегишли бўлган Қўй-Тошдаги уйидан ҳайдаб чиқарилди. Бу ҳақда собиқ президентнинг ўғли Қодир Атамбоев маълум қилди, деб ёзмоқда Қирғизистон маҳаллий оммавий ахборот воситалари. 

“Улар мени,  онамни ва оила аъзоларимни Қўй-Тошдаги уйимиздан,  аждодларимиз заминидан,  барча қариндошларимиз, том маънода 100 метр узоқликда кўмилган ердан ноқонуний равишда чиқариб,  бизни бошпанасиз қолдирмоқчи,  суд ижрочилари етиб келишди”, дейди Атамбоевнинг ўғли.

Унинг сўзларига кўра, Бишкек туман судининг қарори билан 30 га яқин одам, жумладан, полиция вакиллари саройга келган. Қодирбек расмийларнинг ҳаракатларини ноқонуний, деб атади. Унинг оиласи Олий суд ва Конституциявий палатага мурожаат қилишни режалаштирган.

Кичик Атамбоевга кўра, давлат Социал-демократлар партияси қароргоҳи ва Медиа Форумни мусодара қилмоқчи. 

“Бу мутлақо қонунбузарлик... Шунга қарамай, суд ижрочилари юқоридан келган буйруқ билан ўзларининг ноқонуний хатти-ҳаракатларини бошлашмоқда. Мени шу ерда ўлдиринглар. Отамни даволатиш учун чет элга боришимга ҳам рухсат бермайсизлар. Мамлакат ичидаги уйимни олиб қўйяпсизлар”, деб ёзди у ўзининг Facebook’даги саҳифасида. 

Ушбу воқеаларнинг силсиласи 2019 йилда Қўй-Тошда содир бўлган ҳодисаларга бориб тақалади. Ўшанда Атамбоевнинг мулки муҳрланган эди. Ижро органи собиқ президентнинг уйини давлат балансига олмоқчи бўлди. Садир Жапаров “у ерда кексалар учун муассаса очамиз”, деди. 

Жорий йилнинг июнь ойи бошида Бишкекнинг Биринчи май туман суди 2019 йилда Қўй-Тош қишлоғида содир этилган коррупция ва тартибсизликлар иши бўйича ҳукм чиқарди. Ҳозирда хорижда бўлган Алмазбек Атамбоев сиртдан 11 йилу 6 ойга озодликдан маҳрум этилди. Суд собиқ президентни давлат мукофотларидан маҳрум этиш ва мулкини мусодара қилиш бўйича қарор чиқарди. Ҳукм устидан шикоят қилинган, иш ҳозирда Бишкек шаҳар судида кўрилмоқда. 

2022 йил май ойида Давлат мулкини бошқариш жамғармаси Атамбоевнинг Қўй-Тошдаги уйи мусодара қилиниб, давлат мулкига ўтказилганини маълум қилди. Жамғарма ходимлари собиқ президент оиласидан уйдан чиқиб кетишни талаб қилган. Шундан сўнг Атамбоевнинг оила аъзолари уй ҳудудида дам олишга муҳтож болалар учун ўқув-соғломлаштириш спорт мажмуаси очмоқчи эканлигини маълум қилди. 

Атамбоевнинг ҳибсга олиниши

Қирғизистонга 2011-2017 йилларда раҳбарлик қилган Атамбоев 2019 йилнинг 8 август куни Чуй вилоятининг Қўй-Тош қишлоғидаги қароргоҳида деярли бир кун давом этган махсус операция давомида қўлга олинган эди. Унга қўйилган барча айбловларни бир неча бор рад этган собиқ давлат раҳбарининг тарафдорлари қаршилик кўрсатган ва махсус бўлинманинг бир зобити операция давомида ҳалок бўлган. Тўқнашув вақтида 100 дан ортиқ одам, жумладан, полициячилар тиббий ёрдам сўраб мурожаат қилган. 

Собиқ президент ҳибсга олинганидан бир неча кун ўтиб, ҳуқуқ-тартибот идоралари ходимларига нисбатан зўравонлик қўллаш, оммавий тартибсизликлар уюштириш, қотиллик, қотилликка уриниш, шунингдек, гаровга олишни ташкил этиш, Бишкек иссиқлик электр станциясини реконструкция қилишдаги коррупция, Бишкекдаги “Форум” саноат гуруҳи биноси билан ноқонуний битим тузиш, Қўй-Тош қишлоғи ва Иссиқкўл вилоятидаги ер участкаларини ноқонуний эгаллаб олиш айбловлари қўйилган. 

Собиқ давлат раҳбари 2020 йил ёзида 11 йилу 2 ойга қамоқ жазосига ҳукм қилинган эди. Кейинчалик Атамбоевга қўйилган баъзи айбловлар олиб ташланган, 2022 йил июнида эса у 2020 йил октябрь ойида Бишкекда оммавий тартибсизликлар уюштирганликда айбланиб, оқланган эди. 

Суд қарори билан 2023 йил 14 февралда 3,5 йил тартибли колонияда ўтирганидан сўнг озодликка чиқди ва республикани тарк этди. Жорий йилнинг 3 июнь куни эса Бишкекнинг Первомай туман суди Қўй-Тош воқеалари бўйича ҳукм чиқарди. Собиқ президент Алмазбек Атамбоев мол-мулки мусодара қилиниб, давлат мукофотларидан маҳрум қилинган ҳолда 11 йил 3 ойга озодликдан маҳрум этилди. Ишдаги бошқа айбланувчиларга ҳам турли муддатлар берилди. Аммо орадан бир қанча вақт ўтиб, Қирғизистон Президенти Садир Жапаров собиқ давлат раҳбари Алмазбек Атамбоевга нисбатан чиқарилган суд қарорига изоҳ берди ва уни афв этишга тайёрлигини айтди.