Украина Россия билан Истанбулда музокара ўтказишга тайёр – Ермак

Украина келаси ҳафта Истанбулда Россия билан музокараларнинг янги босқичини ўтказишга тайёр. Бу ҳақда Украина Президенти девони раҳбари Андрей Ермак маълум қилди.

Шунингдек, у Киев конструктив муҳокама ўтказмоқчи эканини ва бунинг учун музокаралар олдидан Россия делегациясидан ўт очишни тўхтатиш шартлари бўйича меморандум олиш муҳимлигини таъкидлади.

AFP'нинг қайд этишича, бу талаб Украинанинг музокараларда иштирок этишининг расмий шарти экани ҳали аниқ эмас.

28 май куни Россия Ташқи ишлар вазири Сергей Лавров Россия Украинага 2 июнь куни Истанбулда тўғридан тўғри музокараларнинг иккинчи раундини ўтказишни таклиф қилаётганини айтди. Унга кўра, Москва “инқирознинг асл сабабларини ишончли тарзда бартараф этишнинг барча жиҳатлари бўйича” ўз позициясини ифодаловчи меморандум тайёрлаган, бу ҳақда томонлар музокараларнинг биринчи раундида келишиб олган.

Украина Россия ҳужжатни олдиндан топширишни талаб қилмоқда. Украина делегацияси раҳбари, Украина Мудофаа вазири Рустам Умаров 28 май куни учрашувлар “натижа бериши керак”, шунинг учун уларнинг ҳар бирига тайёргарлик кўриш зарур, бунинг учун Киев Россия позициясини тушуниши кераклигини айтди. У Украина позицияси акс этган ҳужжатни аллақачон Россия делегацияси раҳбари Владимир Мединскийга топширганини таъкидлади. Шу билан бирга, Умаров “Россия томони жўнаб кетишига яна камида тўрт кун қолганида бизга ўз ҳужжатини кўриб чиқиш учун тақдим этиши кераклиги”ни таъкидлади.

Эслатиб ўтамиз, жорий йилнинг 16 май куни Истанбулда Россия ва Украина делегациялари ўртасида сўнгги уч йил ичида илк учрашув бўлиб ўтганди. Учрашув давомида томонлар “1000 га 1000” форматида ҳарбий асирлар алмашинуви бўйича энг йирик келишувга эришди. Шунингдек, тинчлик келишуви шартлари бўйича меморандум устида иш бошлашга келишилди.

Учрашувдан сўнг Украина Мудофаа вазири Рустам Умаров навбатдаги муҳим қадам сифатида Президентлар Зеленский ва Путин ўртасида учрашув ўтказилишини айтиб ўтди.