Макрон Россияда жосусликда айбланган франциялик иши билан шуғулланмоқда

Франция Президенти Эммануэль Макрон Россияда жосусликда айбланиб ҳибсда сақланаётган франциялик Лоран Винатье иши билан шахсан шуғулланмоқда. Бу ҳақда Президент атрофидаги манбаларга таяниб, BFMTV телеканали хабар берди.

Манбага кўра, Макрон Винатьени имкон қадар тезроқ озод этишга қатъий бел боғлаган ва бу борада тегишли давлат идоралари орқали иш олиб бормоқда. 

Бундан бир кун аввал Кремль Москва ва Париж ўртасида Винатье иши юзасидан алоқалар бўлаётганини маълум қилган эди. Россия томони француз томонига маълум бир таклиф билдирган, ҳозир эса навбат Францияга тегишли экани айтилган. Президент матбуот котиби Дмитрий Песков таклиф тафсилотларини очиқламаган.

Винатьенинг иши 19 декабрь куни Владимир Путин билан бўлиб ўтган тўғридан тўғри мулоқот чоғида ҳам кўтарилган. TF1 телеканали журналисти Жером Гарро бу масала бўйича савол бергани-да, Путин бу исмни илк бор эшитаётганини айтиб, масалани ўрганиб чиқишга ваъда қилган. У, агар Россия қонунчилиги доирасида ижобий ҳал этиш имконияти бўлса, барча зарур чоралар кўрилишини таъкидлаган.

Лоран Винатье Швейцарияда жойлашган гуманитар мулоқот марказида маслаҳатчи бўлиб ишлаган. У 2024 йилнинг июнь ойида Россияда қўлга олинган. Орадан уч ой ўтиб, Россия ҳарбийлари ҳақида маълумот тўплаганликда айбланиб, “хорижий агент” сифатида уч йилга озодликдан маҳрум этилган. Франция Ташқи ишлар вазирлиги бу жазони ҳаддан ташқари оғир деб баҳолаган ва Россиядаги “хорижий агентлар” ҳақидаги қонунчиликни танқид қилган. Макрон эса Винатье Франция ҳукумати учун ишламаганини алоҳида таъкидлаган.

2025 йил август ойида эса Москванинг Лефортово суди сайтида пайдо бўлган маълумотларга кўра, Винатье жосуслик бўйича янги жиноий иш доирасида айбланувчига айланган. Ушбу модда бўйича максимал жазо 20 йилгача озодликдан маҳрум этишни назарда тутади.

Эслатиб ўтамиз, жорий йилнинг июнь ойида Россия Федерацияси Давлат Думаси “хорижий агентлар”ни жиноий жавобгарликка тортишни кучайтирувчи ва Россия расмийларининг фикрича, улар хорижда содир этган маъмурий ҳуқуқбузарликлар учун жавобгарликка тортиш имконини берувчи қонун лойиҳасини маъқуллаганди.