ҲАМАС гаровдаги америкаликни қайтаришга рози бўлди
Олам
−
14 Март 1684
Фаластиннинг ҲАМАС ҳаракати воситачиларга гаровга олинган АҚШ фуқаросини озод қилишга ва икки фуқароликка эга ҳалок бўлган тўрт нафар асирнинг жасадини топширишга тайёрлигини маълум қилди. Бу ҳақда гуруҳнинг тегишли баёноти эълон қилинди.
“Бугун эрталаб ҲАМАС воситачиларга кеча, 13 март куни қилган таклифига ўз жавобини етказди. Биз АҚШ фуқаролигига эга бўлган исроиллик ҳарбий хизматчи Иден Александрни қўйиб юборишга ва икки фуқароликка эга бўлган тўрт нафар ҳалок бўлган гаровга олинганларнинг жасадларини топширишга розимиз”, дейилади хабарда.
ҲАМАС гаровга олинганлар ва жасадларни қанча муддатда топширишга тайёрлиги ҳақида маълумот берилмаган. Ҳаракат, шунингдек, гаровга олинганларни қайтариш эвазига фаластинлик маҳбусларни Исроил қамоқхоналаридан озод қилишни талаб қилиш-қилмаслигини ҳам маълум қилмаган.
“ҲАМАС ўт очишни тўхтатиш бўйича келишувнинг иккинчи босқичи бўйича музокараларни бошлаш ва бу борада келишувга эришишга тўлиқ тайёрлигини тасдиқлайди”, дея қўшимча қилган гуруҳ вакиллари.
Қолаверса, ҳаракат Исроилни “ўз зиммасига олган барча мажбуриятларни бажаришга” чақирган.
Маълумот учун, жорий йилнинг 12 март куни Доҳада Қатар воситачилигида ва Америка маъмурияти вакиллари иштирокида Исроил ва ҲАМАС ўртасида тўғридан тўғри бўлмаган музокараларнинг янги босқичи бошланди.
Эслатиб ўтамиз, Исроил ва Фаластин ҲАМАС ҳаракати ўртасида сулҳ 19 январь куни кучга кирган эди. Ушбу сулҳ уч босқичдан иборат бўлиши режалаштирилган бўлиб, унда томонлар асирларни ва ҳалок бўлганларнинг жасадларини алмашиши керак. Биринчи босқич 1 март куни тугаган.
Кейинчалик, 2 мартда АҚШ Президентининг махсус вакили Стив Уиткофф томонларга янгиланган келишув лойиҳасини тақдим этди. Исроил дарҳол АҚШ ташаббусини қабул қилди. ҲАМАС эса бу ташаббусни қатъиян рад этди ва аввалги келишувларга риоя қилишни давом эттиришини билдирди. Аммо шундан сўнг, Исроил ҲАМАС ушбу шартларга розилик билдирмаса, ҳарбий ҳаракатларни қайта бошлаши билан таҳдид қилди.
