АҚШ бир кунда мингта “олтин карта” сотиб, 5 млрд доллар ишлади

АҚШ Савдо вазири Говард Лутник бир кун ичида 1 000 та “олтин карта” сотилганини ва бу орқали ҳукумат 5 миллиард доллар даромад қилганини маълум қилди. Бу ҳақда у “All In” подкастида сўз очди.

Ҳар бири 5 миллион доллар турадиган “олтин карта” хорижликларга АҚШда доимий яшаш ҳуқуқини беради. Ушбу карта оддий грин-картанинг қимматроқ муқобили сифатида таклиф қилинмоқда.

“Бундай картани сотиб олган шахслар Америкада яшаш ҳуқуқига эга бўлади, агар улар яхши одам бўлса ва хавфсизлик текширувидан ўтган бўлса. Дунёда 37 миллион киши ушбу картани сотиб олишга қодир. Президент миллион дона “олтин карта” сотишимиз мумкин деб ўйлайди”, дейди Говард Лутник.

Бунгача Лютник 250 минг киши “олтин карта” сотиб олишга қизиқиш билдирганини даъво қилган. 

Подкаст давомида “олтин карта” ёки “Трамп картаси” қаердан келиб чиққани ҳақида сўралганда, Лутник бу ғоя Трампга тегишли эканини маълум қилган. Унинг сўзларига кўра, бу фикр инвестор Жон Полсон билан учрашув чоғида пайдо бўлган.

Лутник ўзининг вазифаси Трампнинг режасини амалга ошириш бўлганини айтиб, “мен буни қандай қилиш кераклигини тушуниб етдим”, дея қўшимча қилган.

Эслатиб ўтамиз, бир ой олдин Дональд Трамп Овал кабинетда журналистлар билан суҳбатда Қўшма Штатлар бой хорижликларга АҚШда яшаш ва ишлаш ҳуқуқини берувчи ҳамда Америка фуқаролигига йўл очадиган “олтин карта”ларни сотишини айтган эди. “Олтин карта” ҳукуматнинг EB-5 иммиграцион визаси дастури ўрнини босади.