Трамп хорижлик бойларга “олтин карта”лар сотмоқчи

Қўшма Штатлар бой хорижликларга АҚШда яшаш ва ишлаш ҳуқуқини берувчи ҳамда Америка фуқаролигига йўл очадиган “олтин карта”ларни сотади. Бу ҳақда мамлакат Президенти Дональд Трамп кеча, 25 февраль куни Овал кабинетда журналистлар билан суҳбатда маълум қилди.

Унинг таъкидлашича, “олтин карта”нинг нархи тахминан 5 миллион АҚШ долларини ташкил қилади.

“Биз олтин картани сотмоқчимиз. Сизда “яшил карта” (green card) бор. Ва бу эса “олтин карта”. Биз ушбу картани тахминан 5 миллион долларга баҳолаймиз ва бу сизга яшил картанинг афзалликларини беради, шунингдек, бу фуқароликка йўл бўлади. Бу картани сотиб олиб, мамлакатимизга бой одамлар келади”, деди давлат раҳбари.

АҚШ Савдо вазири Говард Лутникнинг тушунтиришича, олтин карта ҳукуматнинг EB-5 иммиграцион визаси дастури ўрнини босади. Трампнинг сўзларига кўра, “олтин карта”лар савдоси икки ҳафта ичида бошланиши мумкин. У миллионлаб карталар сотилишини кутмоқда.

“Ҳуқуқий нуқтаи назардан, бу мутлақо қонунийдир”, деди АҚШ Президенти.

Россиялик олигархларга ҳам “олтин карта”лар сотилиши ҳақидаги саволга Дональд Трамп шундай жавоб берди:

“Ҳа, балки. Мен бир қанча рус олигархларини биламан, улар жуда яхши одамлардир”.

Эслатиб ўтамиз, олдинроқ Дональд Трамп “Россиянинг нодир ер металларига америкалик инвесторлар учун кириш бўйича келишувга эришмоқчилигини” айтганди. Бунгача Россия Президенти Владимир Путин Москва Қўшма Штатларга нодир металларни қазиб олиш ва алюминий ишлаб чиқариш соҳасида ҳамкорлик қилишни таклиф қилишга тайёрлигини айтганди.