Путин АҚШга Россияда ноёб металлар қазиб олишни таклиф қилди

Россия Президенти Владимир Путин АҚШга Россия ҳудудида ноёб ер металларини қазиб олиш соҳасида қўшма ишларни таклиф қилишга тайёрлигини маълум қилди. У, шунингдек, мамлакатлар алюминий ишлаб чиқариши мумкинлигини айтди. Бу ҳақда у кеча, 24 февраль куни Россия давлат телеканали мухбири Павел Зарубин билан суҳбатда сўз очди.

“Америка компаниялари билан бу соҳада ҳамкорлик қилиш ҳақида ўйлашимиз мумкин. Мисол учун, Красноярск ўлкасида, ҳатто Совет даврида ҳам янги ГЭС қуриш ва қўшимча алюминий ишлаб чиқариш қувватларини яратиш режалаштирилган эди”, деди Путин.

Россия Президентининг таъкидлашича, ушбу лойиҳа “инвестицион” бўлиши мумкин.

“Дастлабки ҳисоб-китобларга кўра, у бугунги нархларда 15 миллиард долларга тенг эди ёки бўлади, лекин биз бу ҳақда ўйлашимиз мумкин”, деб тушунтирди Президент.

Россия Федерациясидаги нодир ер металлари ҳақида гапирар экан, Путин бугунги кунда мамлакатда уларни ўзлаштириш бўйича етарли ишлар қилинмаётганини тан олди.

“Ноёб, камёб ер металлари иқтисодиётнинг замонавий тармоқлари учун жуда муҳим таркибий қисм, жуда муҳим ресурслардир. Ва биз бу йўналишда ҳали кам иш қиляпмиз. Кўпроқ ишлашимиз керак”, деди у.

Қайд этиш жоиз, Путиннинг Бу гаплари АҚШ Президенти Дональд Трампнинг Украинадан кўрсатилган ёрдам эвазига ноёб ер металларига кириш ҳуқуқини талаб қилаётган бир пайтда янгради. Трамп яқин икки ҳафта ичида Украина Президенти Владимир Зеленский билан учрашиб, икки давлат ўртасида табиий ресурслар бўйича келишувни имзолашини айтганди.

north_east

Трамп Зеленскийдан Украинани “сотиш”ни талаб қиляпти

“У шу ҳафта ёки кейинги ҳафта шартнома имзолаш учун келиши мумкин ва бу ажойиб бўларди. Мен у билан Овал кабинетда учрашишдан хурсанд бўлардим”, деди у кеча, 24 февраль куни журналистлар билан суҳбатда.

Бу орада АҚШ Молия вазири Скотт Бессент “Fox News” телеканалига берган интервьюсида Украина ва АҚШ ўртасидаги “стратегик фойдали қазилмалар, энергетика ва давлат корхоналари”ни ўз ичига олган келишув Киевга “иқтисодий хавфсизлик кафолатлари” беришини айтди.

“Бу келишув Президент Трампнинг Украина ва Россия ўртасида тинчликка эришиш стратегиясининг бир қисми бўлиб, украиналикларга тинч ҳаётга қайтиш имконини беради”, деди Бессент.

Шу билан бирга, Бессентнинг таъкидлашича, битим Украина учун АҚШ томонидан тўғридан тўғри ҳарбий кафолатларни ўз ичига олмайди, аммо Қўшма Штатлар мамлакатнинг “иқтисодий келажагига катта ресурсларни сармоя киритиши” ва шу орқали унга “иқтисодий хавфсизлик кафолати”ни тақдим этиши ҳақида “сўзсиз кафолат” мавжуд.

“Америка компанияларининг маҳаллий активлари қанчалик кўп бўлса, АҚШ Украина иқтисодиётининг яхши ривожланишидан шунчалик кўп манфаатдор бўлса, бу Украина халқи учун шунчалик кўп хавфсизлик яратади ва америкалик солиқ тўловчилар учун даромадлар шунчалик юқори бўлади”, деб тушунтирди вазир.