Putin AQSHga Rossiyada noyob metallar qazib olishni taklif qildi

Rossiya Prezidenti Vladimir Putin AQSHga Rossiya hududida noyob yer metallarini qazib olish sohasida qo‘shma ishlarni taklif qilishga tayyorligini ma’lum qildi. U, shuningdek, mamlakatlar alyuminiy ishlab chiqarishi mumkinligini aytdi. Bu haqda u kecha, 24 fevral kuni Rossiya davlat telekanali muxbiri Pavel Zarubin bilan suhbatda so‘z ochdi.

“Amerika kompaniyalari bilan bu sohada hamkorlik qilish haqida o‘ylashimiz mumkin. Misol uchun, Krasnoyarsk o‘lkasida, hatto Sovet davrida ham yangi GES qurish va qo‘shimcha alyuminiy ishlab chiqarish quvvatlarini yaratish rejalashtirilgan edi”, dedi Putin.

Rossiya Prezidentining ta’kidlashicha, ushbu loyiha “investitsion” bo‘lishi mumkin.

“Dastlabki hisob-kitoblarga ko‘ra, u bugungi narxlarda 15 milliard dollarga teng edi yoki bo‘ladi, lekin biz bu haqda o‘ylashimiz mumkin”, deb tushuntirdi Prezident.

Rossiya Federatsiyasidagi nodir yer metallari haqida gapirar ekan, Putin bugungi kunda mamlakatda ularni o‘zlashtirish bo‘yicha yetarli ishlar qilinmayotganini tan oldi.

“Noyob, kamyob yer metallari iqtisodiyotning zamonaviy tarmoqlari uchun juda muhim tarkibiy qism, juda muhim resurslardir. Va biz bu yo‘nalishda hali kam ish qilyapmiz. Ko‘proq ishlashimiz kerak”, dedi u.

Qayd etish joiz, Putinning Bu gaplari AQSH Prezidenti Donald Trampning Ukrainadan ko‘rsatilgan yordam evaziga noyob yer metallariga kirish huquqini talab qilayotgan bir paytda yangradi. Tramp yaqin ikki hafta ichida Ukraina Prezidenti Vladimir Zelenskiy bilan uchrashib, ikki davlat o‘rtasida tabiiy resurslar bo‘yicha kelishuvni imzolashini aytgandi.

north_east

Tramp Zelenskiydan Ukrainani “sotish”ni talab qilyapti

“U shu hafta yoki keyingi hafta shartnoma imzolash uchun kelishi mumkin va bu ajoyib bo‘lardi. Men u bilan Oval kabinetda uchrashishdan xursand bo‘lardim”, dedi u kecha, 24 fevral kuni jurnalistlar bilan suhbatda.

Bu orada AQSH Moliya vaziri Skott Bessent “Fox News” telekanaliga bergan intervyusida Ukraina va AQSH o‘rtasidagi “strategik foydali qazilmalar, energetika va davlat korxonalari”ni o‘z ichiga olgan kelishuv Kiyevga “iqtisodiy xavfsizlik kafolatlari” berishini aytdi.

“Bu kelishuv Prezident Trampning Ukraina va Rossiya o‘rtasida tinchlikka erishish strategiyasining bir qismi bo‘lib, ukrainaliklarga tinch hayotga qaytish imkonini beradi”, dedi Bessent.

Shu bilan birga, Bessentning ta’kidlashicha, bitim Ukraina uchun AQSH tomonidan to‘g‘ridan to‘g‘ri harbiy kafolatlarni o‘z ichiga olmaydi, ammo Qo‘shma Shtatlar mamlakatning “iqtisodiy kelajagiga katta resurslarni sarmoya kiritishi” va shu orqali unga “iqtisodiy xavfsizlik kafolati”ni taqdim etishi haqida “so‘zsiz kafolat” mavjud.

“Amerika kompaniyalarining mahalliy aktivlari qanchalik ko‘p bo‘lsa, AQSH Ukraina iqtisodiyotining yaxshi rivojlanishidan shunchalik ko‘p manfaatdor bo‘lsa, bu Ukraina xalqi uchun shunchalik ko‘p xavfsizlik yaratadi va amerikalik soliq to‘lovchilar uchun daromadlar shunchalik yuqori bo‘ladi”, deb tushuntirdi vazir.