Жанубий Кореяда бир ҳафталик мотам эълон қилинди

Бугун, 29 декабрь куни Jeju Air 2216 рейси Муан халқаро аэропортида ҳалокатга учрагани учун Жанубий Корея ҳукумати 7 кунлик миллий мотам эълон қилди. Бу ҳақда “The Korea Times” хабар берди.

Самолёт ҳалокати юзасидан ўтказилган фавқулодда хавфсизлик йиғилишида Жанубий Корея президенти вазифасини бажарувчи Чой Санг Мок ҳалок бўлганларнинг яқинларига ҳамдардлик билдирган.

“Биз ушбу кутилмаган фожиада ҳалок бўлганларнинг оила аъзоларига чуқур ҳамдардлик билдирамиз”, деган Чой.

Молия вазирлигининг маълум қилишича, ҳалокат содир бўлган жойда, шунингдек, 17 та шаҳар ва вилоятда, жумладан Сеул ва жануби-ғарбий Кванжу шаҳрида ёдгорлик қурбонгоҳлари ўрнатилади.

Вазирликнинг қўшимча қилишича, давлат амалдорлари қурбонларга ҳурмат белгиси сифатида мотам ленталарини тақиб юради.

Чой, шунингдек, Муанни махсус офат зонаси сифатида белгилаган.

“Биз соғайиш ишлари, марҳумларнинг оилаларини қўллаб-қувватлаш ва жароҳатланганларга тиббий ёрдам кўрсатиш учун барча зарур ёрдамни кўрсатамиз”, деди у.

Президент вазифасини бажарувчи тегишли идораларга барча мавжуд ресурслар, жумладан, асбоб-ускуналар, ходимлар ва инфратузилмани жалб этиш бўйича кўрсатмалар берди.

Шунингдек, у авария сабабларини ҳар томонлама ўрганиб чиқишга ва топилмаларни марҳумларнинг оилалари ва жамоатчиликка тўлиқ ошкоралик ҳамда тезкорлик билан ошкор қилишга ваъда берди.

Эслатиб ўтамиз, бугун, 29 декабрь куни Жанубий Кореядаги аэропортда бортида 181 киши бўлган самолёт ҳалокатга учраганди. Самолёт мамлакат жануби-ғарбидаги Муан халқаро аэропортида учиш-қўниш йўлагидан чиқиб кетган ва қўниш йўлаги ташқарисидаги тўсиққа урилиб, ёниб кетган.

Хабар қилинишича, ичида 175 йўловчи ва олти нафар борт ходими бўлган Jeju Air самолёти Таиланднинг Бангкок шаҳридан қайтаётган ва қўнаётган вақтда аварияга учраган. Йўловчиларнинг 173 нафари Жанубий Корея фуқароси ва икки нафари Таиланд фуқароси бўлган. Ҳалокатга учраган Boeing бир кун олдин ҳам бортдаги фавқулодда вазият тўғрисида хабар берган. Ўшанда ҳаво кемаси парвозни давом эттиришдан олдин мажбурий қўнишни амалга оширган. Сўнгги маълумотларга кўра, 179 киши ҳалок бўлган. Омон қолган икки киши – бир йўловчи ва экипаж аъзоларидан бири.